2017 jyldyń alǵashqy jarty jyldyǵynda Ońtústik Qazaqstan oblysyna 52 850 sheteldik jáne otandyq týrister (byltyr 33 myń týrist kelgen) saiahattaýǵa kelgen. Onyń 3600-i (2016 j. I jarty jyldyǵynda 2883 sheteldik týrist kelgen) sheteldik qonaqtar. Bul ótken jyldyń tiisti merzimimen salystyrǵanda 50%-ǵa kóp. Bul týraly OQO kásipkerlik, indýstrialdy-innovatsiialyq damý jáne týrizm basqarmasynyń ókilderi habarlady.
OQO ákiminiń baspasóz qyzmetiniń jazýynsha, sheteldik týristerdi ejelgi Túrkistan, Otyrar aýdandarynyń tarihi oryndary qyzyqtyryp, olar kóbinese Arystan bab jáne Qoja Ahmet Iassaýi kesenelerin aralap júr. Sheteldik meimandardyń birazy Ońtústikke «EKSPO-2017» halyqaralyq kórmesi aiasynda kelip jatyr. Búginge deiin shara sheńberinde kúngeige de kelip-ketýdi uiǵarǵan týristerdiń ishinde Qytai, Úndistan jáne Singapýr eliniń azamattary da bar. Óńirdegi tarihi oryndar, sáýlettik qurylymdar men eskertkishterdi tamashalaý úshin sheteldik qonaqtar birneshe kún júrgen.
Aita keteiik, búgingi tańda oblysymyzdyń barlyq aýdan, qalalarynda 1, 2 jáne 3 kúndik týristik baǵyttar jumys isteidi. Olardyń aiasynda tarihi-mádeni jáne tabiǵi 84 nysandy aralaýǵa bolady. Týristik baǵyttarǵa qosylǵan negizgi nysandar Otyrar qalashyǵy, Arystan bab keseseni, Saýran qalashyǵy, Qoja Ahmet Iassaýi kesenesi men Áziret Sultan kesheni, Sairam-Ógem memlekettik ulttyq-tabiǵi parki men Aqmeshit úńgiri jáne t.b. oryndar.
Týristik baǵyttardyń ishinde Otyrar aýdanyndaǵy týristerdi qyzyqtyratyn etnoaýyl da bar. Qazaq aýylynyń aýmaǵynda kóshpendilerdiń mádenieti men turmysyn barynsha shynaiy qalpynda kórip, sezinýge bolady. Jylqy men túiege minip, ásem tabiǵatta serýendeýge, keń dalanyń taza aýasynan jutyp, qazaqtyń ulttyq taǵamdarynan dám tatýǵa bolady.
