Jyl basynan beri kópbalaly otbasylar 27 milliard teńgege járdemaqy aldy, - dep habarlaidy Tengrinews.kz tilshisi Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
2022 jyly qańtarda kópbalaly otbasylarǵa beriletin memlekettik járdemaqy tólemderimen jalpy somasy 27 milliard teńge boldy. Orta eseppen 487,6 myń otbasy qamtyldy.
Bul memlekettik járdemaqyǵa 4 jáne odan da kóp kámeletke tolmaǵan nemese 23 jasqa deiingi kúndizgi bólimde oqityn stýdent balalary bar otbasylar tabysyna qaramastan úmitker bola alady.
"Tólem mólsheri bala sanyna bailanysty tólenedi jáne 2022 jyly 49 100 teńge (4 bala), 61 383 teńge (5 bala), 73 666 (6 bala) teńge, 85 948 teńge (7 bala), 8 balaǵa 98 016 teńge, 9 balaǵa 110 268 teńge, 10 balaǵa 122 520 teńge, 11 balaǵa 134 772 teńge, 12 balaǵa 147 024 teńge, 13 balaǵa 159 276 teńge, 14 balaǵa 171 528 teńge, 15 balaǵa 183 780 teńge, 16 balaǵa 196 032 teńge nemese ár balaǵa 12 252 teńge boldy", - delingen habarlamada.
Eske salaiyq, kópbalaly otbasylarǵa beriletin memlekettik járdemaqy Qazaqstanda 2020 jyly 1 qańtardan bastap ataýly áleýmettik kómek kórsetýdiń jańa mehanizminde kózdelgen tabysy az jáne kópbalaly otbasylardy qoldaýdyń úsh negizgi baǵyty sheńberinde engizilgen bolatyn. Bul járdemaqy olardyń kiristerin esepke almai beriletini aityldy.
