«Jýsan» gýmanitarlyq operatsiiasy nátijesinde Qazaqstanǵa qaqtyǵys aimaǵynan 524 azamat oralǵan. Bul týraly Aqparat jáne qoǵamdyq damý ministri Dáýren Abaev esep berý kezdesýinde málimdedi, dep habarlaidy Baq.kz.
Ministrdiń sózinshe, búginde el aýmaǵynda beibitshilik, kelisim jáne birlikte 18 konfessiia ókilderi ómir súrýde, olardyń múddelerin 3738 dini birlestik usynady. Bul rette ministrlik eki negizgi baǵytqa erekshe mán beredi: birinshisi – memlekettik uiymdastyrýda zaiyrly qaǵidattardy nyǵaitý, ekinshisi – dini saladaǵy turaqtylyqty qamtamasyz etý jáne dini negizdegi ekstremizm men radikalizmniń taralýynyń aldyn alý.
«Dinaralyq turaqtylyq pen kelisimdi saqtaý úshin din salasyndaǵy mamandardyń biliktilik daiarlyǵy úlken ról atqarady. Ótken jyly Nur-Sultan, Almaty jáne Atyraý qalalarynda destrýktivti dini aǵymdardyń yqpalyna ushyraǵan adamdardy qaita qalpyna keltirý boiynsha dini qairatkerlerdi daiarlaý kýrstarynan 190 imam men teolog ótti.
Sonymen qatar, óńirlik aqparattyq-túsindirý toptarynyń jumysy jańǵyrtyldy jáne ońtailandyryldy. Olardyń sany tórt ese qysqardy, alaida olardyń jumys sapasyna basa nazar aýdaryldy. 2018 jyly lektorlyq toptar 38 myńnan astam is-shara uiymdastyrdy», - dedi Abaev.
Ministr Ulttyq qaýipsizdik organdary «Jýsan» gýmanitarlyq operatsiiasynyń 3 kezeńin sátti ótkizgenin, onyń sheńberinde qaqtyǵys aimaǵynan Qazaqstanǵa 524 azamat (137 áiel men 357 bala) oralǵanyn aitty.
«Bizdiń Ministrlik ákimdiktermen birlesip oralǵandarǵa meditsinalyq, psihologiialyq, quqyqtyq jáne áleýmettik kómek kórsetedi», - dep aitty ol.
