«Jýsan» operatsiiasymen elge jetkizilgen áielderdiń 95 paiyzy radikaldy dini seniminen tolyq bas tartty. Bul týraly halyqqa esep berý kezdesýinde QR Aqparat jáne qoǵamdyq damý ministri Aida Balaeva aitty, dep habarlaidy "Ult aqparat".
«Radikaldy dini aǵym qurbandaryn ońaltý – árine uzaq merzimdi jumys. Bul psihologiialyq, zańdy-quqyqtyq, áleýmettik, meditsinalyq keshendi kómekti qajet etedi. Onyń ishinde psihologtardyń, teologtar men imamdardyń kásibi biligine qoiylatyn talap óte joǵary. Bul oraida, elimizdiń barlyq óńirinde «Aqniet» ońaltý ortalyǵynyń filialdary jumys jasaidy. Sonyń ishinde, ásirese «Jýsan» operatsiiasymen elge jetkizilgen áielder men balalardy ońaltý – eń basty nazarda. Júieli de sapaly jumystar nátijesinde búginge deiin, elge oralǵan áielderdiń 95 paiyzy radikaldy dini senimnen tolyq bas tartty», - dedi Aida Balaeva.
Sonymen qatar ministr elimizde dini ahýal turaqty ekendigin, jat dini aǵymdardyń aldyn alý men onyń qurbandaryn ońaltý jumystary júieli jolǵa qoiylǵandyǵyn basa aitty.
