QR Mádeniet jáne sport ministri Arystanbek Muhamediuly aitys tóńiregindegi túitkildi saýaldarǵa jaýap berdi, dep habarlaidy QazAqparat.
Búgin Úkimet úiinde ótken baspasóz máslihaty barysynda BAQ ókilderi ministrden: «16 oblysta aitys ótkizildi. Al sonyń jeńimpazdarymen «Altyn dombyra» aitysy nelikten ótpei qaldy? Júrsin Ermandar nege basqa aitys ótkizdi? Osyǵan qaraǵanda aitys ekige bólingeni me?», - dep suraǵan edi.
«Árine, aitys - bizdiń tól dástúrimiz. Qazirgi kezde Qazaqstanda keńinen damyp kele jatyr. Aitys - jekelegen tulǵalardyń menshiktep alǵan kásibi emes. Ol - búkil halyqtyń, qazaq halqynyń rýhani bailyǵy. Sol sebepti biz qazir aitysty aimaqtarda uiymdastyramyz. Máselen, Aqtóbede, elimizdiń basqa da aimaqtarynda ótti», - dedi ol.
Onyń aitýynsha, jergilikti ákimdikter aitys qazylar alqasynyń tóraǵasy kim bolatyndyǵyn, alqaǵa múshe bolyp kimder shaqyrylatyndyǵyn sheship, ony ministrlikpen kelisedi. Jalpy, qazylar alqasyn belgileýdiń arnaiy erejesi de bar.
«Al Júrsin Ermanǵa kelsek, biz ol kisige úlken qurmetpen qaraimyz. Ózderińiz bilesizder, ol kisi jeltoqsannyń 28-29-ynda Almatyda aitys ótkizdi. Sol kezde habarlasyp, ministrlikten qandai kómek kerektigin suradyq. Bylaisha aitqanda, ol kisimen birge aitysqa qatysty jumys isteýge úlken josparymyz bar», - dedi ministr.
Onyń aitýynsha, Aqtóbedegi aitysqa elimizdiń 16 óńirinde uiymdastyrylǵan aitystyń jeńimpazdary qatysqan.
«Aitys óte joǵary deńgeide ótti. Teledidardan da kórsetildi», - dedi ol.
