Qazaqstan halqy Assambleiasynyń HHV sessiiasy barysynda sóz alǵan aqyndar aitysynyń uiymdastyrýshysy Júrsin Erman Elbasy Nursultan Nazarbaevtan aitysqa qoldaý kórsetýdi surady, dep habarlaidy sputniknews.kz.
Minberge shyqqan Júrsin Erman úlken sahnalarda sóz bastap júrgenimen, Elbasynyń mysy basyp, sál qobaljyp turǵanyn jetkizdi.
"Biraq qobaljyǵanymmen, júregimdegi sózimdi aitamyn. Aitys týraly bir aýyz sóz aitpai ketsem, meni 150 aqyn tútip, jep qoiady. Táýelsizdik jyldarynda ótken aitystardyń barlyǵynda sizdiń sóz portretińizdi jasaǵan ýaqytta zaldaǵy myńdaǵan halyq shýyldap, gýildep, qoldap otyrǵan kezde keide kózime jas keledi. Muny jaǵympazdyqpen aityp otyrǵan joqpyn. Sizdiń sailaýlaryńyzdyń aldynda úsh ret aqyndar aitysyn jasadym. Sonyń bárinde sizdiń beineńizdi aqyndar kókke kótergen kezde men qazaqtyń óneriniń qudiretine tań qalamyn", — dedi Júrsin Erman.
Onyń aitýynsha, qazir ultqa jani ashityn tek bes-alty azamattyń arqasynda ǵana aitys kúnin kórip otyr. "Almatydaǵy Baýyrjan Baibek, Atyraýdaǵy Nurlan Noǵaev, keshegi Baqtyqoja Izmuhambetov, Berdibek Saparbaev, Qyrymbek Kósherbaev, Altai Kólginov ákimder aitysty qoldap otyr. Osy azamattardyń kómegimen ǵana kún kórip otyrmyz. Aqyndar sizdiń saiasatyńyzdy nasihattaý úshin otqa da, sýǵa da túsýge daiyn otyr. Arqasynan qaǵyp qoisa boldy, ári qarai sairai beredi", — dedi Erman. Óz kezeginde Memleket basshysy qazirgi aitystyń deńgeiin kóterý qajettigin aityp ótti.
"Aitys bizdiń tamyrymyz, dástúrimiz. Meniń maqalama bul da kiredi. Menińshe, aitystar oblystarda ótse, sosyn onyń jeńimpazdaryn respýblika boiynsha kórsetsek. Ánine sózi sai bolsa deimin. Qyrǵyzdarda, basqa elderde bar, solardyń áni de keremet, ár sózi de filosofiia. «Sender mynany aityńdar, Nazarbaevty maqtańdar» dep komanda beredi, sosyn ketedi. Keide onyń ishinde neshi túrli báleler aitylyp ketedi", — dedi Elbasy.
"Qazir kóptegen talantty jastar shyǵyp kele jatyr. Olardy halyqaralyq deńgeige shyǵarýǵa uialmaimyz. Arqasynan qaǵyp qoisańdar boldy, eldiń mártebesin kótere beredi", — dedi Júrsin Erman.
