Túrkistan oblysynda jýrnalisti óltirýge tapsyrys bergen sheneýnik pen onyń sybailastary sottaldy, - dep habarlaidy "Ult aqparat" KTK telearnasyna silteme jasap.
Telearna málimetinshe, Túrkistan oblysy Saryaǵash aýdany bilim bóliminiń burynǵy basshysy Baýyrjan Mairihov endi 11 jylyn temir torda ótkizedi.
Al qylmysty uiymdastyrýǵa kómektesken úsh azamat 10 jáne 13 jyl aralyǵynda jaza arqalasa, oq atqan jaldamaly adam 12,5 jylǵa sottaldy.
"Bas bostandyǵynan aiyrý jazasyn taǵaiyndaýda olardyń buryn sottalmaǵany, jábirlenýshiniń úsh sottalýshyǵa qatysty keshirim bergeni, sondai-aq úsh sottalýshynyń asyraýynda jas balasy bolýy, barlyǵynyń da buryn sottalmaǵany nazarǵa alyndy. Sot úkimi zańdy kúshine engen joq", - deidi Túrkistan oblysy qylmystyq ister jónindegi mamandandyrylǵan aýdanaralyq sot tóraǵasy Qasym Qalmaǵambetov.
Eske salaiyq, biyl qańtarda jýrnalist Amangeldi Batyrbekovtiń úiine killer kelip myltyqpen atqan. Biraq jaldamaly killer jýrnalisti onyń ulymen shatastyryp alǵan. Denesine birneshe oq tigen 31 jastaǵy jigit aýyr jaraqat alyp, emdelip shyqqan bolatyn.
Kóp uzamai shabýyl jasaǵandar ustaldy. Qolǵa túskender kisi óltirýge Saryaǵash aýdany bilim bóliminiń basshysy Baýyrjan Mairihov tapsyrys bergenin aitqan. Sebebi sheneýnikke jýrnalistiń ózi týraly birneshe ótkir maqala jazǵany unamaǵan. Sondyqtan óziniń kómekshisine 5 million teńge berip, tilshiniń kózin joiýdy tapsyrǵan.
