Foto: Pexels.com
Ótken jyly jol-kólik oqiǵalary aldyńǵy jylmen salystyrǵanda eki esege jýyq kóbeiip ketken. Sonymen qatar, jaraqat alǵan balalar sany 4 myńnan 10 myńǵa deiin ósti. Senator Marat Qojaev óz depýtattyq saýalynda osyndai alańdatarlyq derekterdi jariia etti, dep habarlaidy Ult.kz.
Senatordyń aitýynsha, jol apattarynyń jiileýiniń negizgi sebepteriniń biri – júrgizýshilerdi daiyndaý deńgeiiniń tómendigi. Bas prokýratýranyń málimetinshe, jol-kólik oqiǵalarynyń 96%-y jol qozǵalysy erejelerin buzýdan týyndaidy. Kóptegen júrgizýshiler mektebiniń túlekteri sapaly bilim almaidy, al keibir júrgizýshi kýáligin zańsyz jolmen iemdenedi. Taksi qyzmetinde eleýli kemshilikter baiqalyp otyr. Taksi júrgizýshileri demalyssyz jumys isteidi jáne mindetti meditsinalyq tekserýden ótpeidi, bul aýyr zardaptarǵa ákeledi.
«Júrgizýshilerdi daiarlaý jáne attestattaý júiesin jetildirý sharalaryn qabyldaý qajet. Bul úshin júrgizýshilerdi oqytatyn uiymdarǵa memlekettik baqylaý engizý, emtihan tapsyrý jáne júrgizýshi kýáligin alý tártibin qaita qaraý kerek. Sonymen qatar, ainalma joldardyń qurylysyn jedeldetý, eldi mekenderde jaryqtandyrý men jaiaý júrginshiler ótkelderin qamtamasyz etý, jol-kólik oqiǵalaryn esepke alýdyń biryńǵai tsifrlyq júiesin ázirleý jáne zamanaýi jol standarttaryn engizý mańyzdy. Jol erejesin buzýshylarǵa baqylaýdy kúsheitý maqsatynda jasyryn patrýldeý ádisin keńinen qoldaný, quqyq buzýshylyqtardy avtomatty túrde tirkeý jáne jol qozǵalysy erejelerin júieli túrde buzatyn júrgizýshilerdi qaita emtihan tapsyrýǵa mindetteý usynylady», – dep atap ótti senator Marat Qojaev.
