Ǵalymdardyń aitýynsha, 2012 jyldyń 21 jeltoqsanynan beri Jer shary galaktikadaǵy «Qaraqurdymnyń» (Chernaia dyra) tartylys sheńberinde kele jatyr. Onyń aldynda ǵalymdar arasynda: «Sol sheńberge kirgen soń jer planetasy kez kelgen ýaqytta saǵyzsha sozylyp bir-eki múinet ishinde joq bolyp ketýi múmkin» degen úrei boldy. Árine baǵymyzǵa orai ol qorqynysh búginde artta qaldy. Sodan beri jer betiniń ár túpkirinde aqylǵa qonbaityn, sanaǵa syimaityn qupiia qubylystar burynǵydan beter qabyndap kóbeiip ketti. Sonyń biri – úlken temirlerdi bir-birine úikegendei úreili dybystardyń jii-jii estile bastaýy. Bul qupiiany da eshkim áli dál túsindirip berip jatqan joq.
Shyndyǵynda, munyń barlyq syry qasietti «Kálam-Sháripte» tur! Biraq Shákárim qajy aitqan: «Sóitip buzyp, búldirip esil dindi, – Din dese esti azamat tura qashar» zamanda mundai aqiqattar ertegi siiaqty estiledi. Ony ateist te, kosmopolit te, tipti, dindarlar da qabyldai almaidy. Álgi dybystardy quranda «náqýýr úni» degen. Ǵulamalar ondai qubylys 1-aqyrzamanda bolady dep jazyp ketken. Osy shyndyqtardan shyǵaryp aitaiyn degenim – mynaý.
Menińshe, árbir adam – galaktika! Ol galaktikada bir qupiia planeta bar. Onyń aty – Júrek. Eger Amanatqa qiianat jasamai, júrekti Qudaidyń mekenine ainaldyra alsaq, onda ol maiak qusap Máńgilik Baqtyń eline jetkizedi. Al Hannas-laǵinniń erkine berip qoisaq, ol barlyq sáýlesin tonatyp, «qaraqurdymǵa» ainalady. Bul – adamnyń ólimi. Tániń tiri bolýy múmkin, biraq rýhyń sónik bolǵasyn, kúlli jaryqty jutyp, jalmap qoiatyn qubyjyqsyń.
Osy ólim týraly ardaqty Paiǵambarymyzdyń (sǵs) nemeresi Hazireti Qusaiyn budan 1340 jyl buryn bylai dep aityp ketipti: «Adamzattyń ólimi 3 nárseden bolady. Birinshisi, tákapparlyq. Bul – dinniń ólýi. Sol úshin ibilis qarǵysqa ushyraǵan. Ekinshisi, qanaǵatsyzdyq. Bul – rýhtyń joiylýy. Sol úshin Adam ata jánnattan qýyldy. Úshinshisi, qyzǵanysh. Ol – ashý-yzanyń negizi. Sol úshin Qabyl Abyldy óltirdi». Mine, qazirgi adam balasynyń júregin osy úsh kesapat indet jailap alǵan. Osy «qaraqurdymnyń» tartylys sheńberinde kele jatqanda bizdiń bolashaǵymyzda – baian, tirshiligimizde – bereke, ómirimizde mán bar dep aita almaimyn.
Basqany bilmeimin, ózim osynaý qurdymnan saý shyǵýdyń jalǵyz joly – Qudaidyń rahmet nury sebelegen qasietti Ramazan aiynyń ár tańsárisinde: «Ei, nuryńnan rýhymdy bólip jan jaratqan, aqyl-sana, júrek pen myi bergen Erekshe Meiirimdi Qul súigish Alla, tezirek Jábireiil (ǵs) perishteńdi jiberip: «Jalǵandyqtyń kúni batty! Aqiqattyń tańy atty!» dep 18 000 ǵalamǵa jar shashtyra gór! Ǵafilet kórpesin serpip, ólim uiqysyndaǵy adamzatty oiatyp, men qara bet qulyńnyń óli júregin tirilte gór!» dep zar eńirep duǵa qylý ǵana degen bailamǵa keldim...
Svetqali Nurjan,
05.05.2020 jyl
