Frantsiiada jalǵasyp jatqan jappai narazylyq kezinde politsiia men demonstranttar arasynda qaqtyǵys boldy. Quqyq qorǵaý organdary sherýshilerdi taratý úshin kózden jas aǵyzatyn gaz, jaryq-dybys granatalary men sý atqysh mashinalardy qoldandy. Keibir demonstranttar politsiiaǵa túrli zattar laqtyrǵan.
Frantsiia Ishki ister ministrliginiń málimetinshe, bir kúnde el boiynsha 71 500 adam narazylyq aktsiialaryna qatysqan. Onyń 24 500-i Parijde jinalǵan. Qaqtyǵystar saldarynan 48 politsei men jandarm jaraqattanyp, 504 adam ustalǵan.
Bordo qalasyndaǵy Kapýtsin aýdanynda betperde kigen bir top adam politsiia bólimshesine shabýyl jasaǵan. Olar ǵimarattyń kireberisindegi qoqys jáshikterin órtep, jalyn keiin bólimsheniń ózine taraǵan. Oqiǵa boiynsha qylmystyq is qozǵaldy.
Narazylyqtar bilim berý salasyndaǵy kadr tapshylyǵy máselesin de kún tártibine shyǵardy. Frantsiianyń bilim ministri muǵalim jetispeitin mektepterge 3 myń ýaqytsha muǵalim jiberiletinin málimdedi.
Ministrliktiń málimetinshe, 114 mektepte pedagog tapshylyǵy asa kúrdeli deńgeige jetken. Taǵy 400 mekteptegi jaǵdai shuǵyl aralasýdy qajet etedi.
