The Wall Street Journal basylymynyń jazýynsha, AQSh Ýkrainaǵa Donbass aýmaǵyn berýdiń ornyna NATO-ǵa tolyqqandy múshe bolýdy usyný múmkindigin qarastyryp jatyr, dep habarlaidy ult.kz.
Basylym derekkózderiniń málimetinshe, ótken aptada Dýblin mańyndaǵy áskeri áýe bazasynda AQSh prezidentiniń arnaiy ókili Djared Kýshner bul máseleni Eýropa sheneýnikterimen jáne Ýkraina prezidenti Vladimir Zelenskiimen talqylaǵan.
Mundai usynys Abý-Dabide ótken úshjaqty kelissózderdiń sońǵy kezeńinde de aitylǵan. Eýropa elderiniń biriniń basshysy bul ideia tamyz aiyndaǵy telefon arqyly kelissózder kezinde de kóterilgenin jetkizgen.
WSJ málimetinshe, Vashington qazir eki yqtimal stsenariidi talqylap jatyr:
1. Ýkraina ózi baqylaýyndaǵy Donbass aýmaqtarynan bas tartady. Onyń ornyna NATO-ǵa tolyqqandy múshe bolady.
2. Soǵys qazirgi maidan shebi boiymen toqtatylady. Al Ýkraina AQSh-pen jáne, múmkin, Eýropa elderimen jasalatyn halyqaralyq kelisim arqyly qaýipsizdik kepildikterine ie bolady.
Alaida Vashingtonnyń Ýkrainaǵa NATO músheligin usyný nusqasyn qanshalyqty baiypty qarastyryp otyrǵany ázirge belgisiz. Buǵan deiin Donald Tramp Ýkrainanyń aliansqa qosylý múmkindigin joqqa shyǵarǵan. Al Abý-Dabidegi kelissózderde Resei tarapy Kievten NATO-ǵa kirý nietinen bas tartýdy tikelei talap etken.
Kelissózderden keiin Djared Kýshner X áleýmettik jelisinde AQSh ókilderi «beibitshilik ornatýǵa degen shynaiy nietti» baiqaǵanyn jazdy. Onyń aitýynsha, Tramp Ýkrainaǵa birjaqty kelisim tańǵysy kelmeidi. Kez kelgen kelisim Ýkraina jáne Eýropamen tyǵyz konsýltatsiia júrgizý arqyly jasalady.
Sonymen qatar Berlinde ótken «Tilek bildirýshiler koalitsiiasy» kezdesýinde soǵystan keiingi qaýipsizdik kepildikteri talqylanǵan. Kýshner Eýropa qaýipsizdiginiń negizgi tiregi NATO bolyp qala beretinin atap ótti. Ol bolashaq kelisim aiasynda NATO–Resei keńesi siiaqty qoldanystaǵy infraqurylymdy paidalanýdyń mańyzyn da aitty.