© Photo : Dean Moriarty
Premer-ministr Álihan Smaiylov jumyssyzdarǵa bos jumys oryndary týraly elektrondy habarlamalar jiberý máselesin pysyqtaýdy tapsyrdy, dep habarlaidy Sputnik Qazaqstan.
Ol biyl Ulttyq jobalardy iske asyrý aiasynda 269 myńnan asa jumys orny qurylýǵa tiis ekenin atap ótti. Qazir 203 myńnan astam adam jumysqa ornalasqan. Alaida 175 myńy – ýaqytsha jumys.
"Biz turaqty jumys oryndaryn kóbeitýge kúsh salýymyz kerek. Ol úshin tsifrlyq tehnologiialarǵa súiený mańyzdy. Memlekettik organdardyń júielerin tolyq integratsiialai otyryp, jumyspen qamtý servisteriniń barlyǵyn tsifrlandyrý qajet", - dedi Smaiylov Úkimet otyrysynda.
Otbasynyń tsifrlyq kartasy, Elektrondy eńbek birjasy men Jumys oryndaryn qurýdyń integratsiialanǵan kartasyn biriktirgennen keiin, jumyssyz júrgenderge elektrondy habarlamalar arqyly vakansiialar usynýǵa bolady, dep jalǵastyrdy sózin Premer.
"Jumyssyzdarǵa ótinish jazbai-aq bos jumys oryndaryn usyný mańyzdy. Mundai qyzmetterdi smartfon arqyly qoljetimdi etý qajet", - dedi Úkimet basshysy.
Smaiylov Prezidenttiń tapsyrmasymen memlekettik organdar men barlyq deńgeidegi ákimderdiń jumysy jańa jumys oryndaryn qurý boiynsha KPI kórsetkishi negizinde baǵalanatynyn eske saldy.
Sondai-aq ol jastardy jumyspen qamtýdyń jańa tásilderi men mehanizmderin engizýge erekshe nazar aýdarýdy tapsyrdy.
"Jyl saiyn eńbek naryǵyna 300 myńǵa jýyq jas shyǵady. Olardyń jumys tájiribesi joq, sondyqtan jastarǵa birinshi kezekte jumysqa ornalasýǵa kómektesý kerek", - dedi Premer-ministr.
Smaiylov tiisti ministrlikterge eńbek adamynyń oń imidjin qalyptastyrýdy tapsyrdy.
