QR Kásipodaqtar federatsiiasy tóraǵasynyń birinshi orynbasary Muhtar Tinikeev «ArselorMittal Temirtaý» basshysyna ótinish joldady. Onyń aitýynsha, Qaraǵandy kómir basseinindegi jaǵdai jiti baqylaýǵa alynýy kerek, dep habarlaidy QazAqparat.
«Qazmyrysh (Kaztsink kompaniiasy) týraly aitaiyn: onda qyzmetkerler men olardyń otbasynyń densaýlyǵyna basa mán berilip otyr. Kásiporynda sanitarlyq óńdeý jumystary kúsheitilip, jumystaǵy personal gigiena quraldarymen qamtylǵan. Issaparlar men jinalystar toqtatylǵan. Kásiporyndaǵy sharalardyń bári shektelgen. Keńse qyzmetkerleri qashyqtan jumys isteý tártibine kóshirilgen. Qyzmetkerlerdi jumysqa arnaiy avtobýstar ákeledi. Qazir iri kásiporyndardyń kóbi óz qyzmetkerleri úshin arnaiy avtobýs shyǵaryp jatyr. Ashanalarda tamaq ishý úrdisi de toqtaǵan. Arnaiy lanch-bokstar arqyly tamaq taratady. Kásiporyndaǵy qyzmetkerleri gigiena saqtaý týraly únemi eskertiledi. Baqylaý-ótkizý beketterinde bailanyssyz dene qyzýyn tekserý kesheni ornatylýda. Máselen Qaraǵandydaǵy YDD ferroqorytpa zaýyty men Qaz Carbon kompaniialary osy apparattardy satyp alyp qoiǵany týraly maǵan fotosýretterin jiberdi. Jumys ornyna kirgen azamattyń dene qyzýy avtomatty túrde kórsetiledi. Dene qyzýy 37 gradýstan asyp tursa – qyzyl signal berilip, jumysshynyń aýyryp turǵany kórinedi», - dedi Muhtar Tinikeev OKQ-da ótken baspasóz máslihatynda.
Onyń aitýynsha, Qazmyrysh kompaniiasyndaǵy qyzmetkerler men olardyń otbasylaryna 100 myń maska, táýlik boiynsha jumys isteitinder úshin 120 avtibakterialdy sham taratylǵan.
«Eger kásiporyn óz qyzmetkerleriniń áleýmettik jai-kúiin taldap bilip otyrsa, onda aýrý juqtyrǵandar da az bolady. Osy jiynnyń aldynda ǵana shahtalardyń birindegi kenshimen sóilestim. «Qaldaryńyz qalai?» desem, «Naýqastar kóp» deidi. Shahtaǵa túsetin bes kisiniń ornyna úsh adam túsedi eken. Al karantinge bailanysty jańa jumysshylar qabyldanbai jatyr. Osy jiyndy paidalana otyryp, «ArselorMittal Temirtaý» kompaniiasyna ótinish joldaǵym keledi: Qaraǵandy kómir basseinindegi jaǵdaidy jiti baqylaýǵa alynsa deimin», - dedi ol.
