Foto: inbusiness.kz
Almatyda "Damý bala" baǵdarlamasy arqyly sektsiia men úiirme ashqan kásipkerler tiisti qarajat ýaqytynda túspegendikten ýaqytynda jabylýǵa májbúr ekenin aitty.
31-arnanyń Informbiýro baǵdarlamasynyń habarlaýynsha, kásipkerler ákimdikten bólinetin qarajattyń tym kesh beriletinin aitady. Al keiingi ailardy tipti aqsha túspegen. Sporttyq úiirmelerge qatysatyn 200-ge jýyq bala buǵan deiin "Damý bala" baǵdarlamasymen tegin jattyǵyp kelgen. Alaida keiingi ýaqytta qarajat bólinbei kásip ieleri sharasyz kúige tap boldy. Úiirmeler ótetin ǵimarat jabylyp, jumysshylar ailyqsyz qaldy.
"Memleket bizge bólingen aqshany ýaqytymen berý kerek. Mundai joba bolmasa, bastama bastardyń aldynda biýdjetti durystap esepteý kerek. Men búitip edim, bylai eken degen syltaýlar aitylmaýy kerek. Endi men jap-jańa remont kúiimen qaitadan sol zaldy buzyp qazir dalada júrmiz. Balalarymyzǵa parkte, dalada jattyǵý jasatyp jatyrmyz", – deidi "Damý bala" baǵdarlamasyna qatysýshy Aidar Sháribaev.
Al Almaty qalalyq jetkizýshiler qoǵamdyq birlestiginiń quryltaishysy Natalia Miagkihtiń aitýynsha, sporttyq jáne shyǵarmashylyq sektsiialardyń birazy eńbekterine sai tólemderin ala almai júr.
"Qala ákimdiginiń tarapynan mamyr jáne maýsym aiynyń tólenbegen qarajaty bar. Al shilde aiynyń esep qaǵazy tipti qaralyp ta jatqan joq. Shahardaǵy jetkizýshilerdiń basym bóligi ala almai otyr. Mundai jaǵdai alǵash ret emes. Sondyqtan balalarǵa bólingen aqshanyń ýaqytynda berilýin talap etemiz", – deidi ol.
Almaty qalasynyń ákimi Erbolat Dosaev óz kezeginde "Damý bala" baǵdarlamasyna tiisti mólsherde qarajat bólinip jatqanyn aitady. Bul úshin qala biýdjetinen biyl 16,5 milliard teńge bólingen. Budan bólek jumysty jaqsartý úshin jańa qyzmet kórsetýshilerdi de tartý josparda baryn aitty. Sáikesinshe, ákimdiktiń kásipkerler aldynda esh boryshy joq.
"2023 jyly jáne 2024 jyldyń 7 aiynda ákimdik qyzmetterge aqy tóleýdi ýaqytyly júrgizdi. Boryshtyq mindettemeler joq. 2024 jylǵy 16 tamyzdaǵy jaǵdai boiynsha jetkizýshide 71 belsendi vaýcher bar. 104 vaýcher muraǵattalǵan. Qyzmet kórsetýshi "Damý Bala" baǵdarlamasynyń júiesinde qyzmet kórsetý mekenjaiyn ózgertý týraly kórsetken joq. Baǵdarlamany qarjylandyrý ary qarai da jalǵasa beredi", – dep málimdedi ákimdik.
