Sýret: pressfoto, Freepik
Ulttyq statistika biýrosy Halyqty jumyspen qamtý boiynsha taqyryptyq jinaqty jariialady, dep habarlaidy "Ult aqparat" biýronyń baspasóz qyzmetine silteme jasap.
Ulttyq statistika biýrosy 2021 jylǵy halyq sanaǵynyń qorytyndysy boiynsha halyqty jumyspen qamtý boiynsha kezekti jinaqty shyǵardy (1-2 tom). Jinaqta salalar, jynys jáne jas qurylymy boiynsha jumyspen qamtý deńgeii jónindegi kórsetkishterdi, sondai-aq 2009 jylǵy sanaqpen salystyrǵandaǵy dinamikalyq ózgeristerdi kórýge bolady. Jinaqtyń eki tomy stat.gov.kz saitynyń «Ulttyq sanaqtar» – «Sanaq 2021» bóliminde ornalastyrylǵan.
USB málimetinshe, Qazaqstanda jumyspen qamtylǵan halyq sany 39% ósti.
"2021 jylǵy sanaq qorytyndysy boiynsha jumyspen qamtylǵan halyq sany 9 188 myń adamdy qurady, 2009 jylǵy sanaqpen salystyrǵandaǵy ósim – 39,2%.
Jumyspen qamtylǵandardyń negizgi úlesi qalalyq eldimekenderde – jumyspen qamtylǵan halyqtyń 62,5% nemese 5,7 millionnan astamy. 2009 jyly qalalardaǵy jumyspen qamtylǵan halyqtyń úlesi 57,1% nemese 3,8 mln adamdy quraǵan. Jas toby boiynsha jumyspen qamtylǵandardyń eń kóp sany 30-34 jas aralyǵynda – 1 450 myń adam.
2009 jylǵy sanaq qorytyndysymen salystyrǵanda 2021 jyly joǵary bilimi bar halyqtyń jumyspen qamtylý úlesi 27,1%-dan 30,8%-ǵa deiin artty" - delingen habarlamada.
Biýro málimetinshe, jumyspen qamtýdaǵy áielderdiń úlesi 2009 jylǵy 45%-dan 2021 jyly 48%-ǵa deiin nemese 1,4 mln adamǵa artqan.
"Salalar bólinisinde jumyspen qamtylǵandardyń eń kóp sany aýyl sharýashylyǵynda – 1,41 mln adam nemese jumyspen qamtylǵan halyqtyń 15,3% (17,9% – 2009 jyly). Odan keiin kóterme jáne bólshek saýda – 1,35 mln adam nemese 14,7% (12,9% – 2009 jyly). Jumyspen qamtý boiynsha úshinshi oryndy ónerkásip salasy alady – 1 mln adam nemese 11,1% (11,5% – 2009 jyly).
Barlyq jumyspen qamtylǵan halyqtyń ishinde erlerdiń eń kóp úlesi nemese 17% aýyl sharýashylyǵynda, al áielder boiynsha negizinen saýda salasynda – 16%" - delingen habarlamada.
Kelesi taqyryptyq jinaq 13 qarashada jariialanady.
Aita keteiik, Almaty, Shyǵys Qazaqstan, Qaraǵandy oblystary boiynsha derekter sanaq ótken ýaqytqa, iaǵni olar bólingenge deiin berilgen. Bul rette jańadan qurylǵan oblystardaǵy halyq sany sanaq derekterin eskere otyryp qaita eseptelgen jáne stat.gov.kz saitynda jariialanǵan.
