Koronavirýs indetiniń taralýy men jańa ekonomikalyq syn-qaterler jaǵdaiynda jappai jumyssyzdyqqa jol bermeý úshin jumys oryndaryn qurý basymdyqqa ie. 2020 jyly Memleket basshysynyń tapsyrmasymen Úkimet halyqty qoldaý men ekonomikany turaqtandyrý baǵytynda jedel sharalar paketi qabyldandy.
Onyń ishinde Jumyspen qamtýdyń 2020-2021 jyldarǵa arnalǵan jol kartasyn ázirleý men júzege asyrý eskerilip, bul qujat infraqurylymdyq jobalardy iske asyrý kezinde jumys oryndaryn qurýǵa baǵyttalǵan daǵdarysqa qarsy qadamdar retinde qamtylyp otyr.
Atalǵan maqsattarǵa qol jetkizý úshin Jol kartasy kelesi qyzmetter men nysan túrleri boiynsha infraqurylymdyq jobalardy júzege asyrýdy qarastyryp otyr:
1. áleýmettik-mádeni nysandardyń rekonstrýktsiiasy men qurylysy, kúrdeli ári aǵymdaǵy jóndeý;
2. turǵyn úi-kommýnaldyq sharýashylyq nysyndaryn kúrdeli, orta jáne aǵymdaǵy jóndeýden ótkizý men rekonstrýktsiialaý;
3. injenerlik-kóliktik infraqurylym jelilerin kúrdeli, orta jóndeýden, sondai-aq rekonstrýktsiiadan ótkizý;
4. eldi mekenderdi abattandyrý men kórkeitý.
Eńbek ministrliginiń málimetinshe, Jol kartasy aiasynda 6,7 myńnan astam jobany júzege asyrýǵa 1 trln teńge bólindi. 2020 jylǵy 28 jeltoqsandaǵy jaǵdai boiynsha 6 myń jobaǵa qatysty jumystar aiaqtaldy. Atalǵan jobalarda 237,9 myń adam jumysqa ornalasyp, onyń ishinde 119,6 myńy nemese 50,3 paiyzy halyqty jumyspen qamtý ortalyqtarynyń joldamasy boiynsha qyzmetke turdy.
Jobalardy júzege asyrýdyń negizgi talaby – qaita qurylatyn jumys oryndarynyń 50 paiyzdan kem emes bóligin jumyspen qamtý ortalyqtarynyń joldamasymen kelgen jumyssyzdarǵa usyný.
Jumysqa turǵandar arasynda jastardyń úlesi 47,1 myńǵa jetti nemese 39,3 paiyzy, az qamtylǵandar – 7,7 myń, múmkindigi shekteýli jandar – 2,3 myń.
Osy oraida jumyspen qamytylǵandardyń eń kóbi Shyǵys Qazaqstan (20,9 myń), Jambyl (20 myń), Almaty (19,3 myń) oblystary men Almaty (21,1 myń) qalasyna tiesili. Ortasha jalaqy 89,6 myń teńgeni qurady.
«Jastar arasynda jumysqa ornalasqandardyń basym bóligi Túrkistan (5,1 myń), Shyǵys Qazaqstan (3,8 myń), Jambyl (3,8 myń) oblystary men Almaty (4 myń) qalasynda tirkeldi», - delingen ministrlik málimetinde.
Jas aralyǵy sanaty boiynsha jumysqa turǵandardyń 38 paiyzy 30-45 jasta, al 21 paiyzy 46-60 jas aralyǵynda.
Sonymen qatar, halyqty jumyspen qamtý ortalyqtary joldamasy boiynsha jumysqa turǵandardyń 62 paiyzynda orta, bastaýysh jáne negizgi orta bilimi bar, al 31 paiyzy orta kásibi bilim alǵan adamdar.
Munymen qosa, Jol kartasynyń talaptaryna sáikes, basqa eldi mekennen kelgen jumyssyzdarǵa 2 eń tómengi jalaqy somasynda birjolǵy materialdyq kómek tólenedi. Byltyrǵy jeltoqsan aiynyń sońyna qarai materialdyq kómek 119,2 mln teńge somasynda 1 532 jumysshyǵa berildi.
Atap aitqanda, Jol kartasy boiynsha infraqurylymdyq jobalardy júzege asyrý birqatar problemany sheship, óńirlerdiń áleýmettik-ekonomikalyq ahýalyn jaqsartýǵa yqpal etedi. Bul turǵyda Jol kartasynyń arqasynda 70 jańa bilim berý nysany, 76 densaýlyq saqtaý men mádeniet ári sport nysany, 10 modýldi infektsiialyq aýrýhana salyndy.
Máselen, jumyspen qamtýdyń Jol kartasynyń aiasynda Soltústik Qazaqstan oblysy Qyzyljar aýdany Beskól aýylynda 300 orynǵa arnalǵan mektep salyndy. Atalǵan nysannyń ashylýy úsh aýysymda oqytý problemasyn sheship, sapaly bilim berýge múmkindik beredi.
Aqtóbe oblysyndaǵy Qobda aýdany Terisaqqan aýyly men Sarjansai eldi mekeninde aýyl klýbtary salyndy. Bul nysandar turǵyndar úshin jańa jumys oryndaryn ashyp, turǵyndar arasynda talanttardy damytýǵa jańa serpin beredi.
Jol kartasyn júzege asyrý baǵytynda ekonomikanyń bir-birimen bailanysty salalarynda 100 myńnan astam turaqty jumys ornyn qurýǵa negiz qalady. Osy oraida qabyldanǵan sharalar jumyssyzdyq deńgeiin 5 paiyz shamasynda ustap qalýǵa yqpal etti.
