Aqmola oblysynda jol apatynan aýyr jaraqat alǵan politsiia qyzmetkeri qaitys boldy. Aqmola oblysy men Astana qalasynyń dárigerleri onyń ómirin saqtap qalýǵa bar kúshin salǵanymen, nátije bolmady, dep habarlaidy ult.kz.
Aqmola oblysy politsiia departamentiniń baspasóz qyzmeti habarlaǵandai, 4 qarashada politsiia kapitany Daniiar Taev aýrýhanada kóz jumdy. Ol qyzmettik mindetin atqaryp júrgende jol apatyna ushyraǵan.
— Osy oqiǵaǵa bailanysty qylmystyq is qozǵaldy. JAC kóliginiń júrgizýshisi ustalyp, ýaqytsha ustaý izoliatoryna qamaldy. Tergeý júrip jatyr. Ishki ister ministrliginiń basshylyǵy men qyzmetkerleri qaza tapqan politseidiń otbasy men jaqyndaryna kóńil aitady, — dep habarlady vedomstvo.
Jol apatynan keiin politsiia qyzmetkeri Shortandy aýdandyq aýrýhanasyna jetkizilgen. Aqmola oblysy densaýlyq saqtaý basqarmasynyń málimetinshe, onyń jaǵdaiy asa aýyr bolǵan. Er adam komaǵa túsken.
Dárigerler naýqastyń jaǵdaiyn birlesip baǵalap, ony Astanadaǵy № 2 kópbeiindi oblystyq aýrýhanaǵa aýystyrǵan.
— Dárigerler barlyq qajetti reanimatsiialyq sharany júrgizgenimen, naýqastyń ómirin saqtap qala almady. Ol jol apatynan alǵan aýyr jaraqattarynyń saldarynan qaitys boldy, — dep túsindirdi densaýlyq saqtaý basqarmasy.
Eske salaiyq, buǵan deiin Aqmola oblysyndaǵy tasjolda politsiianyń qyzmettik kóligi jol apatyna ushyraǵan edi. JAC T9 kóliginiń júrgizýshisi jyldamdyqty shekten asyryp, qaýipsiz araqashyqtyqty saqtamai, politsiia kóligine soqtyǵysqan. Oqiǵa kezinde politsiia qyzmetkerleri arnaiy jol tehnikasyn súiemeldep, jol qozǵalysynyń qaýipsizdigin qamtamasyz etip júrgen.
