Qazaqstannyń Tuńǵysh Prezidentiniń tóraǵalyǵymen «Samuryq – Qazyna» ulttyq ál-aýqat qoryn basqarý jónindegi keńestiń otyrysy ótti, dep habarlaidy "Ult aqparat" Elbasynyń baspasóz qyzmetine silteme jasap.
Jiynǵa Premer-Ministr A.Mamin, Prezident Ákimshiliginiń Basshysy B.Saǵyntaev, «Samuryq-Qazyna» aktsionerlik qoǵamynyń basqarma tóraǵasy A.Esimov, «Samuryq-Qazyna» aktsionerlik qoǵamynyń táýelsiz direktory R.Evans, Tuńǵysh Prezidenttiń kómekshisi D.Aqyshev, basqarma músheleri jáne Qordyń ulttyq kompaniialarynyń basshylary qatysty.
Otyrysta «Samuryq-Qazyna» aktsionerlik qoǵamynyń 2018-2028 jyldarǵa arnalǵan damý strategiiasyn júzege asyrý týraly esep tyńdaldy, sondai-aq Qordy odan ári transformatsiialaý jónindegi tapsyrmalardyń oryndalý barysy talqylandy.
– Qor el ekonomikasynda mańyzdy ról atqarady. Biz ozyq halyqaralyq tájiribeni zerdelep, osy Qordy qurdyq. Búginde «Samuryq-Qazyna» qory el ekonomikasyn damytýǵa eleýli úles qosyp keledi, – dedi Elbasy.
Basqosý barysynda «Samuryq-Qazyna» aktsionerlik qoǵamynyń basqarma tóraǵasy A.Esimov korporativtik ortalyqtardyń qurylymyn ońtailandyrý jáne Qordyń basqarý deńgeilerin qysqartý nátijeleri týraly baiandady. Nursultan Nazarbaevqa Qor kompaniialaryn jekeshelendirý, indýstrialdyq-innovatsiialyq damý jáne «Nurly jol» baǵdarlamalaryn iske asyrý barysy týraly málimdeldi. A.Esimovtyń aqparatyna sáikes, búgingi tańda Qor jalpy somasy 8 trillion teńgeni quraityn 54 jobany júzege asyrýda jáne 68 myń jańa jumys orny ashyldy.
- Biz Qor portfelin ártaraptandyrý úshin egemen qorlarmen jáne halyqaralyq investorlarmen strategiialyq seriktestik ornatý múmkindikterin qarastyryp jatyrmyz. Qazirgi tańda jalpy somasy 13,3 milliard dollardy quraityn eki jaqty 28 kelisimge qol qoiyldy, – dedi «Samuryq Qazyna» AQ basqarma tóraǵasy.
Jiynda, sondai-aq, R.Evans, A.Mamin jáne ulttyq kompaniialardyń basshylary baiandama jasady.
Qazaqstannyń Tuńǵysh Prezidenti ulttyq ál-aýqat qorynyń qyzmeti jiti baqylaýynda bolatynyn atap ótti.
– Qordyq basty mindeti – aktivterdi kóbeitý, tabysty arttyrý jáne ulttyq kompaniialardy damytý. Qor aktivteriniń el ekonomikasy úshin strategiialyq mańyzy bar. Jańa basshylyq jumysynyń oń nátijelerin atap ótkim keledi. Qysqa merzim ishinde qaryzdy azaityp, kompaniialardyń tabysty jumys isteýin, qarjy quraldaryn tiimdi basqarýdy qamtamasyz ete aldyq, – dedi Nursultan Nazarbaev.
Elbasy, sondai-aq, Qordyń satyp alýlardy uiymdastyrý jáne kásipkerlikti qoldaý salasyndaǵy jumysynyń nátijelerin joǵary baǵalady.
– Qor ishinde bir jerden satyp alý aitarlyqtai qysqaryp, tenderlerdiń kólemi artty. Olar ashyq ótkiziletin boldy. Búginde jumsalatyn shyǵyn 5 ese azaidy. Ókinishke qarai, memlekettik organdardyń satyp alý isinde mundai nátije joq. Mindetter durys belgilengen jaǵdaida qoldanystaǵy zań normalary da milliardtaǵan teńgeni únemdeýge múmkindik beretinin Qor qyzmeti aiqyn kórsetip otyr, – dedi Qazaqstannyń Tuńǵysh Prezidenti.
Nursultan Nazarbaev Qordyń adam resýrstaryn basqarý salasynda qolǵa alyp jatqan sharalaryna qoldaý bildirdi.
– Kompaniialar men kásiporyndardyń basty aktivi – adamdar. Jumysqa alý rásiminiń ashyq bolǵany mańyzdy. Barlyq taǵaiyndaýlar transparentti bolýǵa tiis, – dedi Elbasy.
Jiyn qorytyndysy boiynsha Qordyń qarjy jaǵdaiyn odan ári jaqsartýǵa, elimizdiń taýar óndirýshilerin qoldaýǵa, «Qazaqtelekom» jáne «Air Astana» kompaniialarynyń aktsiialaryn IPO-ǵa shyǵarýǵa baǵyttalǵan sheshimder qabyldandy.
