8 aidyń qorytyndysy boiynsha, elimizde jumyrtqa óndirýdiń kólemi 8%-ǵa azaiyp, al baǵasy 30% qymbattady. Bul týraly elordada «Agroónerkásiptik keshendi damytý jańa baǵdarlamanyń tujyrymdamasy» taqyrybynda ótken dóńgelek ústel barysynda QR Jumyrtqa óndirýshiler qaýymdastyǵynyń basshysy Maksim Bojko aitty, dep habarlaidy QazAqparat.
«Agroónerkásiptik keshenge qatysty memlekettiń negizgi mindeti – aýyldaǵy adamdardy jumyspen qamtý, elimizdiń turǵyndaryn azyq-túlikpen qoljetimdi baǵada qamtamasyz etý. Osy jerde bizneske qatysty qarama-qaishylyq týyndaidy, sebebi biznestiń maqsaty – tabys tabý. Eger tabys bolsa – kásipker aqsha salyp, damytýǵa daiyn. Al tabys bolmasa, adamdar jumysynan aiyrylsa, memleketke salyq túspeidi. Sondyqtan aýyl sharýashylyǵyna qatysty biznes tabysty bolýy kerek», - deidi QR Jumyrtqa óndirýshiler qaýymdastyǵynyń basshysy Maksim Bojko.
Ol bizneske qatysty tabysty qalai eseleýge bolatynyn aitty.
«Eń aldymen shyǵyn mólsherin azaitý kerek. Ónimniń sapasyn tómendetý arqyly shyǵyn mólsherin de azaitýǵa bolady, biraq biz bul nusqany qarastyrmaimyz. Jańa tehnologiialar engizý arqyly da tabysty kóbeitýge bolady. Biz osy baǵytty qoldaimyz. Muny investitsiialyq sýbsidiia berý arqyly júzege asyrýǵa bolady. Sondai-aq, ónim baǵasyn qymbattatý arqyly da tabysty eseleýge bolady. Bul jerde de memleket pen biznes arasynda qarama-qaishylyq týyndaidy. Memleket azyq-túlik baǵasynyń qoljetimdi bolǵanyn, al biznes ókilderi qymbat bolǵanyn qalaidy», - deidi ol.
Onyń sózign qaraǵanda, ótken jyly Úkimet Qazaqstanda jumyrtqa jetkilikti deńgeide, tipti qajetti mólsherden kóp óndiriletinin, sol sebepti qus fabrikalaryna sýbsidiia tóleýdi toqtatýǵa bolatynyn aitqan.
«Biz jyldyń basynda sýbsidiianyń toqtatylýy óndiristiń azaiýyna jáne baǵanyń ósýine yqpal etedi dep aitqan bolatynbyz. Bul bilik pen halyqtyń kóńilinen shyqpasy anyq. Biraq is júzinde rasymen solai bolǵanyn kórip otyrmyz. 8 aidyń qorytyndysy boiynsha, elimizde jumyrtqa óndirýdiń kólemi 8%-ǵa azaiyp, al jumyrtqanyń baǵasy 30% qymbattady. Ne sebepti biznes jumyrtqany burynǵy kólemde óndire bermedi? Óitkeni sońǵy eki jylda biznestiń tabys deńgeii nólden tómen túsip ketti. Ol tek memleket bólgen sýbsidiia esebinen jumys istep turǵan. Aýyl sharýashylyǵy ministrligi sýbsidiiany eki ese qysqartyp tastady. Odan bólek qus tumaýy epidemiiasy boldy. Osy oraida biz memleketten qoldaý kútemiz, sebebi qustar sany men óndiris kólemin qalpyna keltirýimiz kerek», - deidi QR Jumyrtqa óndirýshiler qaýymdastyǵynyń basshysy Maksim Bojko.
