Búgin Úkimet otyrysynda QR Básekelestikti qorǵaý jáne damytý agenttiginiń tóraǵasy Serik Jumanǵarin qurylys kompaniialarynyń básekelestik emes artyqshylyq alý tásilderin atady, dep habarlaidy QazAqparat.
«Jer ýchaskelerin berýdiń básekeles tásili saýda-sattyq bolyp sanalady. Oǵan arnaiy ekonomikalyq aimaqtardyń aýmaqtarynda nemese áleýmettik kásipkerlik korporatsiialardyń qatysýymen investitsiialyq jáne innovatsiialyq jobalardy iske asyrý jatpaidy. Astana arnaiy ekonomikalyq aimaq aýmaǵynda ónimder shyǵarýmen 50 investitsiialyq joba, turǵyn úi jáne ákimshilik keshender salý boiynsha 135 joba iske asyrylady. Onyń ishinde 65 turǵyn úi nysany «BI Group» holdingine, 9-y «Bazis-A», 7-ýi «Nur Astana Kurylys», 6-ýy «G-Park» tiesili», - dedi agenttik tóraǵasy.
Onyń atap ótýinshe, osy kompaniialar jer ýchaskelerin konkýrstan tys alýdan basqa múliktik, jer salyǵyn, kedendik bajdardy tóleýden bosatylǵan. Áleýmettik kásipkerlik korporatsiialar investitsiialyq jobalar túrinde jer ýchaskelerin turǵyn úiler, saýda ortalyqtaryn, fitnes zaldar, janarmai quiý stantsiiasyn salý úshin satady.
«Básekelestik emes artyqshylyqtar alýdyń basqa tásili memlekettik satyp alý jáne memlekettik-jekeshelik áriptestik boldy. «Memlekettik satyp alý týraly» zańda Úkimet aiqyndaityn tulǵalardan bir kózden satyp alýdy júzege asyrý múmkindigi kózdelgen. Osy tásilmen Túrkistan qalasynda 566 mlrd teńge somasyna konkýrs ótkizbei 149 nysandy salý qyzmetteriniń jetkizýshileri aiqyndalǵan. Onyń ishinde 140 mlrd teńge somasy nemese jumys kóleminiń 25 paiyzy eki qurylys salýshy «BI Group» jáne Bazis-A-ǵa bólingen. Qalǵan jumys kólemi belgisiz ólshemsharttar boiynsha 250-den astam qurylys uiymdary arasynda bólindi», - dedi Serik Jumanǵarin.
Agenttiń tóraǵasynyń aitýynsha, joldardy, aýrýhanalardy, mektepterdi jáne is júzinde qurylys qyzmetterin memlekettik satyp alý bolyp tabylatyn ózge de nysandardy salý jónindegi memlekettik-jekeshelik áriptestik rásimi ashyq emes jáne básekege qabiletsiz bolyp otyr.
«Bul jobalar jumsalǵan qarajatty tolyq jáne jedeldetilgen túrde qaitarýdy 3-5 jyl aralyǵynda kózdeidi», - dedi ol.
