.jpg)
Kezindegi Keńes Odaǵyn maqtasaq ta, dattasaq ta, qalai desek te, sol Eýraziia qurlyǵyndaǵy imperiianyń quramyndaǵy sanaýly ózge elder sekildi, qazaq jurtynyń uly jetistigi, odaqtas respýblika bolyp qurylǵany álem aldyndaǵy shyndyq. Osy, odaq memleketteriniń biri sanalatyn Qazaq respýblikasynyń tutastyǵyn saqtap qalý sol kezdegi aldyńǵy býyn aǵalarymyz - qazaq qairatkerleri úshin ońai bolǵan joq. Sonymen qatar, odan keiingi tyń igerý jyldaryndaǵy qysyltaiań ýaqyttaǵy ultymyzdyń adal da, kúresker uly, saiasat jáne qoǵam qairatkeri Jumabek Táshenovtiń aitýly eńbegin maqtanyshpen, kókirek kere aitýymyzǵa tolyqtai bolady.
Ol 1915 jyly 20 naýryz kúni Aqmola oblysy qazirgi Arshaly aýdanynyń Babatai aýylynda dúniege keledi. Qurylys tehnikýmyn bitirip, jerge ornalastyrý jumysymen ainalysady. Týra otyz úsh jasynda Soltústik Qazaqstan oblysynyń atqarý komitetiniń tóraǵasy bolyp qyzmet atqarady. 1955 jyly Qazaq SSR Joǵarǵy Prezidiým Keńesiniń tóraǵasy bolyp taǵaiyndalsa, 1960 jyldan bastap respýblika Ministrler Keńesiniń tóraǵasy bolyp jumys isteidi. Biraq, osy biik laýazymdarǵa deiin bul azamat túrli memlekettik qyzmette, aitar bolsaq, oblystyq partiia komitetterinde qyzmet atqardy. Múmkin, qudaidyń qazaq eliniń mańdaiyna bergen uly shyǵar. Sol bir ýaqytta, Nikita Hrýshevtiń solaqai saiasatynyń kesirinen, Qazaqstan aýmaǵynan bes oblysty tyń ólkesine jatqyzyp, kórshi Reseidiń quramyna kirgizýge shaq qalǵanda, óz taǵdyryn oilamai ara túsýi úlken erlik emes pe?! Otanshyldyqtyń úlgisi dep osyny ait! Áitpese, qazirgi kúnderi Qazaqstan shekarasyn qai aýmaqtan shegender edik?.. Qazaq jeriniń qazirgi asta-tók astyǵy kimniń ieliginde qalar edi?!
Áli esimde, Aqmola oblysynyń Esil aýdanynda qyzmet etip júrgenimde, sol óńirdegi astyq qoimalarynyń (elevator) qabyrǵalarynda «Esil – vorota tseliny!» dep jazylyp turatyn. Sol jaqta júrgenimde jumys babymen burynǵy aýyldyq partiia hatshysy Razdolnyi aýylynyń turǵyny Esbol Kerimbekov aqsaqalmen kezdeskenimde, sóz arasynda ol kisiniń Hrýshevtiń osy aýdanda bolǵanyn jáne onyń Keńes Odaǵynyń túkpir-túkpirinen kelgen tyń igerýshilerdiń aldynda sóilegen sózderinen, bul ólkeniń kóp ýaqyt ótpei RSFSR-diń quramyna qosylatynyn ańǵarǵan edim. Sonda: «Qazaq jerinde týyp, orys elinde qalatyn boldym-aý dep oilaǵanym áli kúnge deiin oiymnan ketpeidi», - degeni áli esimde tur.
Osy odaqtas respýblika úkimetiniń túpkilikti qarsy turýy men dáleldi jáne dáiekti túsiniktemesinen keiin, qoldan uiymdastyrylǵan «Tyń ólkesi» jobasy taratylyp, elimizdiń soltústik jáne shyǵys oblystary respýblika quramynda qalǵany belgili. Biraq, azýly Ministrler Keńesiniń tóraǵasy Jumabek Táshenov joǵarǵy laýazymynan bosatylyp, sol kezdegi Ońtústik Qazaqstan oblysynyń atqarý komitetiniń tóraǵasynyń orynbasary bolyp «aidaýǵa» jiberiledi. Dál osy oqiǵaǵa orai, Jumeken Nájimedenov pen Shámshi Qaldaiaqovtyń qazirgi Qazaqstan Respýblikasynyń Gimnine ainalǵan qudiretti «Meniń Qazaqstanym» áni qazirgi kúnderi jalpy qazaqstandyqtardyń súiikti ánine ainaldy.
Jumabek Táshenovtiń jary Bátes Ydyrysqyzy óziniń kezinde jýrnalisterge bergen suhbatynda, sol bir ýaqyttaǵy Ministrler Keńesi tóraǵasynyń tyǵyryqqa tirelgen kezeńdegi ustamdylyǵy men alysty kóre biletin qairatkerligin, azamattyǵyn syzdyqtap aitsa da kóp nárseni ańǵartqandai.
Óz ýaqytynda qazaqtardyń uiysyp el bolýyna, qonys etken búkil mekenderin jinaqtap, alyp memleket bolyp, ornyǵýyna, teńdessiz eńbek sińirgen, Kremlge qarsy turyp, nar táýekelmen qazirgi Qazaqstannyń soltústik jáne shyǵys ólkelerin saqtap qalǵan aitýly azamattyń eńbegi shynymen de ólsheýsiz. Kezinde, Jánibek Sálimuly Káribjanov osy oblystyń ákimi bolyp turǵanda (qysqa ǵana ýaqyt), oryssha atalyp kelgen jeti aýdannyń aty birden qazaqsha ataý alǵan edi. Al, qazirgi oblys ákimi, respýblika biligine osy ýaqytqa deiin usynys jasap, bir aýdannyń nemese kishigirim qalanyń atyn (múmkin, Stepnogorsk qalasyn) baiaǵyda-aq, Jumabek Táshenovtiń atyna alyp berýge múmkindigi bar edi ǵoi. Ony kim shektepti! Tek, ákimniń deńgeiiniń tómendigi ǵoi!
