Biyl Ońtústik Qazaqstan oblysynda «Órleý» jobasyn iske asyrý úshin 7,3 mlrd. tenge bólinip otyr. Bul qarajatqa 126 myń adamǵa shartty aqshalai kómek kórsetilip, 27,3 myń adamdy jumyspen qamtý josparlanǵan. Ázirdiń ózinde oblystyń barlyq aýdan, qalalarynda 1630 otbasyǵa 445,0 mln. teńgege shartty aqshalai kómek berilip, eńbekke qabiletti otbasy músheleriniń 95,2 paiyzy jumyspen qamtylǵan. Bul týraly oblys ákimi J: Túimebaevtyń tóraǵalyǵymen ótken jiynda oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Muhit Otarshiev málim etti.
2018 jyldyń 1 qańtarynan bastap qazirgi úsh túrli áleýmettik tólemder ornyna ataýly áleýmettik kómektiń jańa formaty engiziletin bolady. Qiyn jaǵdaiǵa tap bolǵan jáne obektivti sebepterge (jasy, densaýlyq jaǵdaiy, múgedektik jáne ózge áleýmettik osaldyq) bailanysty azamattarǵa shartsyz kómek usynylmaq. Bir sózben aitqanda, kúnkóris deńgeiiniń 60 paiyzynan tómen turatyn az qamtamasyz etilgen azamattarǵa jumyspen qamtýdyń belsendi sharalaryna qatysqan jaǵdaida shartty aqshalai kómek kórsetiletin bolady.
«2015 jyly "Órleý" jobasy bizdiń oblysta pilottyq joba retinde 4 aimaqta iaǵni Arys, Túlkibas, Saryaǵash, Tólebi aýdandarynda endirilip, 139 otbasyǵa 23,0 mln. teńgege shartty aqshalai kómek kórsetildi. Otbasy músheleriniń eńbekke jaramdy 167 adamy jumyspen qamtyldy. 2016 jyly «Órleý» jobasy oblystyń barlyq aýdan, qalalarynda endirilip, 1630 otbasyǵa 445,0 mln. teńgege shartty aqshalai kómek taǵaiyndaldy», - deidi Muhit Baimuhanbetuly.
Oblysta shartty aqshalai kómektiń birjolǵy tólemderine basymdyq berilýde. Shartty aqshalai kómektiń birjolǵy somasy jeke qosalqy sharýashylyqty damytý men jeke kásipkerlik qyzmetti uiymdastyrýǵa jumsalatyn bolady. «Órleý» jobasyna qatysýshylardyń qatarynda 454 adam jeke kásipker retinde salyq organdaryna tirkelip, óz isin ashqan. Atqarylǵan jumystarǵa qanyqqan óńir basshysy «Órleý» jobasynyń halyq arasynda nasihattalýyna kúsh salyp, shartty aqshalai kómekti eńbek pen kásipke beiimi bar azamattarǵa berýdi tapsyrdy.
«Taiaýda ǵana óńirimizge elimizdiń Eńbek jáne halyqty áleýmettik qorǵaý ministri Tamara Dúisenova kelip, «Órleý» jobasynyń iske asý barysyn baǵamdap ketti. Atalǵan pilottyq jobanyń iske asýyna aýdan, qala ákimderi men tiisti bólim basshylary jumyla kirisýi tiis. Eń bastysy, sharty aqshalai kómekter shynaiy naǵyz kómekke zárý azamattarǵa berilip, jobany halyqqa keńinen túsindirý qajet», - dedi J. Túimebaev.
Aita keteiik, «Órleý» jobasyn iske asyrý nátijesinde jyl saiyn ósip turatyn 18 jasqa deiingi balalarǵa arnalǵan járdemaqy alýshylardyń sany 7,8 paiyzǵa tómendep, 59 myń otbasyny quraǵan. Shartty aqshalai kómek alýshylardyń tabystary 3,3 esege artyp otyr.
