Búgin Ońtústik Qazaqstan oblysynyń ákimdiginde óńir basshysy Janseiit Túimebaevtyń tóraǵalyǵymen kezekti selektorlyq rejimdegi apparattyq májilis ótti, dep habarlaidy "Ult aqparat" oblys ákiminiń baspasóz qyzmetine silteme jasap.
Kún tártibinde tasqyn sýlardy saqtaý, jinaqtaý jáne taratýdyń gidrotehnikalyq qurylystaryndaǵy máseleler qaralyp, saladaǵy atqarylyp jatqan jumystar aiasynda oblystyq tótenshe jaǵdailar departamentiniń bastyǵy Nurbolat Derbisov pen oblystyq aýyl sharýashylyǵy basqarmasy basshysynyń orynbasary Turǵanbek Ospanov baiandama jasady.
Jetekshiler aimaq basshysynyń sý tasqynynyń teris áserine jol bermeý, sondai-aq, jinalǵan sýdy keiinnen sýǵarýǵa paidalaný boiynsha sý qoima salýǵa bolatyn jerlerdi anyqtaý tapsyrmasyna orai, Ońtústikte jańadan jobalyq syiymdylyǵy 320,5 mln. sharshy tekshe metrdi quraityn 16 saqtaý ornyn salýǵa bolatynyn aitty. Atalǵan nysandar iske qosylǵanda oblysta 17 myń ga sýarmaly jer jańadan ainalymǵa qosylady eken.
Keltirilgen málimetterdi muqiiat tyńdaǵan J.Túimebaev jańadan salýǵa bolatyn 16 sý qoimasynyń 3 mln. halqy bar óńir úshin tym az ekenin aityp, jalpy jumysty synǵa aldy. Bul rette, aimaq basshysy kórshiles Jambyl oblysynda 141 sý qoimasynyń bar ekenin alǵa tartty.
«Kórshiles oblyspen salystyrǵanda bizdiń óńir halqynyń sany 3 ese kóp, biraq, sý qoimalarynyń sany jaǵynan olardan 3 ese azbyz. Aýyl sharýashylyǵyna beiim óńirmiz deimiz. Túrli ónimderdi kóp shyǵaramyz. Nege osyny oilamadyńyzdar?! 43 sý qoimasyna jańadan salynatyn 16 nysandy qossaq, 59 bolady. Sonda da jartysyna da jetpeiin dep turmyz. Qalai sonda? Esep-qisap qaida? Jospar qaida? 16 emes, bul keminde 56 bolý kerek. Aýdan, qala ákimderimen jeke sóilestim. Sizder bar bolǵany 1-2-eý shyǵady degen aýdandar 6-7 sý qoimasyn salýǵa usynys berip otyr. Bizdiń ákimdikke munan bólek, 40-50 joba daiyndaýdy tapsyramyn», - dedi ákim barlyq aýdan, qala ákimderine bergen tapsyrmasynda.
Jiynda J.Túimebaev orynbasary J.Bókenbaevqa oblystyń barlyq múmkindikterin zertteý arqyly qosymsha úlken sý qoimalarynyń qurylysyn júrgizý boiynsha usynystardy jinaqtap, Sý resýrstary komitetine usynýdy júktedi. Sondai-aq, biýdjetten qurylysyn júrgizý múmkindigi bolmaǵan jaǵdaida, jeke menshik áriptestigi aiasynda iske asyrýdy qolǵa alýdy tapsyrdy. Aita ketý kerek, oblys aýmaǵynda 43 sý qoimasy ornalasqan.
