Ońtústik Qazaqstan oblysynda Elbasynyń «Bolashaqqa baǵdar: rýhani jańǵyrý» atty maqalasynan týyndaǵan qoǵamdyq sanany jańǵyrtý baǵdarlamasyn iske asyrý jónindegi óńirlik komissiianyń otyrysy ótti, dep habarlaidy "Ult aqparat" OQO ákiminiń baspasóz qyzmetine silteme jasap.
Jiynǵa oblys ákimi J. Túimebaev, ziialy qaýym ókilderi, memlekettik jáne úkimettik emes uiymdardyń basshylary men qyzmetkerleri, belsendi jastar qatysty.
M.Áýezov atyndaǵy Ońtústik Qazaqstan memlekettik ýniversitetiniń konferents zalynda ótken jiynda alǵashqy sózdi oblys ákimi J.Túimebaev bastap, Elbasynyń bul maqalasy – memlekettik ideologiiany anyqtaityn basty saiasi qujaty bolyp tabylatynyn jáne «Rýhani jańǵyrý» baǵdarlamasynyń ońtústik óńirinde iske asyrý jumystarynyń ózektiligin atap ótti.
«Elbasy maqalasy- rýhani jańǵyrýdyń jarqyn joly. Osy mańyzdy maqalada zamanǵa sáikes jańǵyrý, onyń ishinde rýhani jańǵyrý máselesi jan-jaqty taldanyp, taiaý jyldarǵa aýqymdy mindetter qoiylyp otyr. Osy oraida oblysymyzda maqalanyń basym baǵyttaryn ilgeriletý, nasihattaý maqsatynda arnaiy spikerler toptary jasaqtalyp, BAQ arqyly qyzý qoldaý sharalary atqarylýda, áleýmettik jelilerde pikirler jariialanýda. Halyqty birlikke, yntymaqqa, tatýlyqqa shaqyratyn jáne ulttyq qundylyqtardy, salt-dástúrdi dáripteitin túrli derekti filmder, rolikter ázirleý qolǵa alynýda», - dedi J. Túimebaev.
Budan bólek, óńirimizde maqalanyń mátini jazylǵan kitapshalar, ádistemelik quraldar shyǵarylyp, taratylýda. Sondai-aq, oblystaǵy tarihi-mádeni eskertkishter aýmaǵynda týristerge qyzmet kórsetetin ulttyq qolóner buiymdary, kádesyilar satatyn saýda dúkenderin jáne tek ulttyq taǵamdar daiyndaityn dámhanalar ashý boiynsha tiisti jumystar atqarylyp jatyr. Alǵashqy nysandardyń biri retinde qazaq halqynyń salt-dástúri men ádet-ǵurpyn pash etetin Otyrar aýdanynda «Alash» etnografiialyq aýyly ashyldy. Jalpy, qoǵamdyq sanany jańǵyrtý baǵdarlamasynyń 6 baǵytynyń 2-i respýblikalyq deńgeide júzege asyrylatyn bolady.
Sonymen qatar, komissiia otyrysynda Ońtústik Qazaqstan oblysynda Jobalyq keńse jumysy týraly óńirlik jobalyq keńseniń basshysy Baqytjan Áshirbekov, «Atameken jáne azamattyq sana» taqyrybynda jazýshy, Halyqaralyq «Alash» syilyǵynyń laýreaty Marhabat Baiǵut, Qoǵamdyq sanany jańǵyrtý baǵdarlamasyn iske asyrý joldarynyń óńirlik erekshelikteri týraly «Intellekt Orda» halyqaralyq áleýmettik-gýmanitarlyq zertteýlerdi yqpaldastyrý institýtynyń bas direktory, professor Sattar Májitov sóz sóilep, negizgi baǵyttardy atady.
«Joǵary oqý oryndarynda jastardy qazaqstandyq patriotizmge tárbieleý joldary» taqyrybynda M.Áýezov atyndaǵy Ońtústik Qazaqstan memlekettik ýniversiteti rektory Jumahan Myrhalyqov, Joǵary oqý oryndarynda rýhani jańǵyrýǵa qatysty turaqtylyq pen tatýlyq týraly Ońtústik Qazaqstan memlekettik pedagogikalyq institýtynyń rektory Ońalbai Aiashev ta óz pikirlerin ortaǵa saldy.
Kezdesý suraq-jaýaptar men pikir almasýlarmen jalǵasty. Otyrys sońynda oblys ákimi J.Túimebaev óńirdegi «Rýhani jańǵyrý» baǵdarlamasyn iske asyrý boiynsha aýdan, qala ákimderine, basqarma basshylaryna jáne quzyrly mekemelerge tiisti ári naqty tapsyrmalar júktedi.
