Foto: freepik.com
Búginde ashyq qujattarda derbes derekterdiń berilýi óte kóp kezdesedi. Derbes derekterdiń osynsha jiyntyǵyn jariialaýǵa bolmaidy. Bul týraly Májilis depýtaty Ekaterina Smyshliaeva aitty, dep habarlaidy QazAqparat agenttigi.
«Zańda derbes derek degen uǵymnyń ózine anyqtama engizip jatyrmyz. Óitkeni qazir onyń naqty túsiniktemesi joq. Uǵymnyń bulaisha túsindirilýi normanyń ekiushty ekenin kórsetedi. Bireýler JSN-di derbes derek dese, taǵy bireýler derbes derek emes deidi. Qazir zań jobasynyń aiasynda sarapshylarmen birge keleshekte osyndai naqty emes normalardy boldyrmaý baǵytynda jumys istep jatyrmyz.
Jaýapkershilikke kelsek, derbes derekter týraly zańnamany buzǵan kez kelgen tulǵa jaýapkershilik arqalaý kerek. Kez kelgen tizim jariia túrde jariialanýy kerek degen talap bar. Biraq onyń ishinde derbes derek bolýy kerek degen talap esh jerde joq», - dedi depýtat.
Májilis ókili atalmysh tizimge engen tulǵalar Qarjy ministrligin derbes derekterin jariialady degen ýájben sotqa bere alatynyn atady.
Onyń sózinshe, qazirgi zańnamada JSN men adamnyń aty-jóni bir jaǵdaida derbes derek bolyp eseptelse, taǵy bir jaǵdaida derbes derek bolyp eseptelmeidi.
«JSN adamnyń aty-jóninsiz berilse, tulǵany anyqtap bere almaidy. Iaǵni, halyqaralyq normada mynandai - derbes derek degen tulǵanyń kim ekenin anyqtap turýy kerek.
JSN sandary aty-jónimen birge berilmese, iesi kim ekenin tabýǵa kómektese me? Kómektese almaidy. Memlekettik organ saittarynyń birinde buryn JSN arqyly adamnyń kim ekenin bilýge bolatyn, keiin ol qyzmetti japty. Iaǵni, JSN adamnyń atymen birge jariialansa, ol derbes derek bolyp esepteledi. Tipti adamnyń aty-jóni men ákesiniń aty da derbes derek bolyp sanalady. Qazirgi zańda osyndai qosar standarttar óte kóp.
Qazir osyndai derekterdi jariialaý gigienasy da pysyqtaýdy qajet etedi. Búginde ashyq qujattarda derbes derekterdiń berilýi óte kóp kezdesedi. Mysaly, sot sheshimderinde derbes derekter bar. Olar ashyq jariialanyp júr. Bul – talap jáne durys. Biraq onyń ishindegi keibir derbes derekterdi jasyrý jaǵyn oilastyrý kerek. Derbes derekterdiń osynsha jiyntyǵyn jariialaýǵa bolmaidy», - dedi Ekaterina Smyshliaeva.
