فوتو: freepik.com
بٷگٸندە اشىق قۇجاتتاردا دەربەس دەرەكتەردٸڭ بەرٸلۋٸ ٶتە كٶپ كەزدەسەدٸ. دەربەس دەرەكتەردٸڭ وسىنشا جيىنتىعىن جارييالاۋعا بولمايدى. بۇل تۋرالى مەجٸلٸس دەپۋتاتى ەكاتەرينا سمىشلياەۆا ايتتى, دەپ حابارلايدى قازاقپارات اگەنتتٸگٸ.
«زاڭدا دەربەس دەرەك دەگەن ۇعىمنىڭ ٶزٸنە انىقتاما ەنگٸزٸپ جاتىرمىز. ٶيتكەنٸ قازٸر ونىڭ ناقتى تٷسٸنٸكتەمەسٸ جوق. ۇعىمنىڭ بۇلايشا تٷسٸندٸرٸلۋٸ نورمانىڭ ەكٸۇشتى ەكەنٸن كٶرسەتەدٸ. بٸرەۋلەر جسن-دٸ دەربەس دەرەك دەسە, تاعى بٸرەۋلەر دەربەس دەرەك ەمەس دەيدٸ. قازٸر زاڭ جوباسىنىڭ اياسىندا ساراپشىلارمەن بٸرگە كەلەشەكتە وسىنداي ناقتى ەمەس نورمالاردى بولدىرماۋ باعىتىندا جۇمىس ٸستەپ جاتىرمىز.
جاۋاپكەرشٸلٸككە كەلسەك, دەربەس دەرەكتەر تۋرالى زاڭنامانى بۇزعان كەز كەلگەن تۇلعا جاۋاپكەرشٸلٸك ارقالاۋ كەرەك. كەز كەلگەن تٸزٸم جارييا تٷردە جارييالانۋى كەرەك دەگەن تالاپ بار. بٸراق ونىڭ ٸشٸندە دەربەس دەرەك بولۋى كەرەك دەگەن تالاپ ەش جەردە جوق», - دەدٸ دەپۋتات.
مەجٸلٸس ٶكٸلٸ اتالمىش تٸزٸمگە ەنگەن تۇلعالار قارجى مينيسترلٸگٸن دەربەس دەرەكتەرٸن جارييالادى دەگەن ۋەجبەن سوتقا بەرە الاتىنىن اتادى.
ونىڭ سٶزٸنشە, قازٸرگٸ زاڭنامادا جسن مەن ادامنىڭ اتى-جٶنٸ بٸر جاعدايدا دەربەس دەرەك بولىپ ەسەپتەلسە, تاعى بٸر جاعدايدا دەربەس دەرەك بولىپ ەسەپتەلمەيدٸ.
«جسن ادامنىڭ اتى-جٶنٸنسٸز بەرٸلسە, تۇلعانى انىقتاپ بەرە المايدى. ياعني, حالىقارالىق نورمادا مىنانداي - دەربەس دەرەك دەگەن تۇلعانىڭ كٸم ەكەنٸن انىقتاپ تۇرۋى كەرەك.
جسن ساندارى اتى-جٶنٸمەن بٸرگە بەرٸلمەسە, يەسٸ كٸم ەكەنٸن تابۋعا كٶمەكتەسە مە? كٶمەكتەسە المايدى. مەملەكەتتٸك ورگان سايتتارىنىڭ بٸرٸندە بۇرىن جسن ارقىلى ادامنىڭ كٸم ەكەنٸن بٸلۋگە بولاتىن, كەيٸن ول قىزمەتتٸ جاپتى. ياعني, جسن ادامنىڭ اتىمەن بٸرگە جارييالانسا, ول دەربەس دەرەك بولىپ ەسەپتەلەدٸ. تٸپتٸ ادامنىڭ اتى-جٶنٸ مەن ەكەسٸنٸڭ اتى دا دەربەس دەرەك بولىپ سانالادى. قازٸرگٸ زاڭدا وسىنداي قوسار ستاندارتتار ٶتە كٶپ.
قازٸر وسىنداي دەرەكتەردٸ جارييالاۋ گيگيەناسى دا پىسىقتاۋدى قاجەت ەتەدٸ. بٷگٸندە اشىق قۇجاتتاردا دەربەس دەرەكتەردٸڭ بەرٸلۋٸ ٶتە كٶپ كەزدەسەدٸ. مىسالى, سوت شەشٸمدەرٸندە دەربەس دەرەكتەر بار. ولار اشىق جارييالانىپ جٷر. بۇل – تالاپ جەنە دۇرىس. بٸراق ونىڭ ٸشٸندەگٸ كەيبٸر دەربەس دەرەكتەردٸ جاسىرۋ جاعىن ويلاستىرۋ كەرەك. دەربەس دەرەكتەردٸڭ وسىنشا جيىنتىعىن جارييالاۋعا بولمايدى», - دەدٸ ەكاتەرينا سمىشلياەۆا.
