Foto: QyzPU
Qazaq ulttyq qyzdar pedagogikalyq ýniversitetiniń stýdentteri sý resýrstaryn únemdi paidalanýǵa arnalǵan innovatsiialyq jobany iske qosty. Olardyń «Avtomattandyrylǵan sýǵarý júiesi» startapy oqý ordasynda ótken saltanatty shara barysynda resmi túrde tanystyryldy, dep habarlaidy Ult.kz.
Bul joba – QyzPU bazasynda eki jyldan beri ótkizilip kele jatqan Demoday «Startup Tomiris» baiqaýynyń jemisi. 2024 jyly atalǵan konkýrsta I oryndy ielengen startaptyń avtorlary – Fizika, matematika jáne tsifrlyq tehnologiialar institýtynyń 3-kýrs stýdentteri Dinara Býlkýnbek pen Ámina Imanova.
Informatika kafedrasynyń aǵa oqytýshysy ári jobanyń ǵylymi jetekshisi Juldyz Bazaeva bul júieniń basty maqsaty – turaqty damý qaǵidattary aiasynda ekologiialyq jáne tehnologiialyq tiimdi sheshim usyný ekenin atap ótti. Al joba avtorlary júieniń tehnikalyq erekshelikterimen tanystyryp, onyń jumys isteý algoritmderin jan-jaqty túsindirdi.
Foto: QyzPU
Avtomattandyrylǵan qurylǵy birneshe negizgi komponentten turady: aýa temperatýrasy men ylǵaldylyǵyn ólsheitin sensor, topyraq ylǵaldylyǵynyń datchigi, sý sorǵysy men solenoidty klapandar. Júie aýa raiy men topyraq jaǵdaiyna qarai derbes jumys isteidi, al basqarý arnaiy ázirlengen mobildi qosymsha arqyly júzege asyrylady. Qosymsha Android jáne iOS platformalarynda qoljetimdi. Onda óshirip-qosý, qolmen jáne avtomatty rejimder qarastyrylǵan.
«Júie tolyqtai avtomattandyrylǵan. Eger topyraq qurǵap ketse, sensorlar arqyly bul týraly signal túsip, sýǵarý protsesi ózdiginen bastalady. Mundai júie ásirese ýaqyty shekteýli adamdar úshin óte tiimdi», – deidi joba avtorlary.
Sýǵarý júiesimen qatar gúlzarlardy kórkeitý jáne klimattyq jaǵdailarǵa beiimdelgen sýarý tártibi de engizildi. Bul bastama tabiǵatty qorǵaý sharalaryna úles qosyp qana qoimai, ekologiialyq mádenietti damytýǵa da yqpal etti.
Jobanyń taǵy bir mańyzdy jetistigi – oǵan avtorlyq quqyq kýáliginiń alynýy. Bul startaptyń innovatsiialyq áleýetin rastaityn mańyzdy qadam.
Ýniversitettiń Basqarma Tóraǵasy – Rektory Gúlmira Qanai jobanyń bolashaǵyna senim bildirip, onyń memlekettik deńgeide keńinen qoldanylatynyna úmit artty. Sonymen qatar, ol mundai bastamalar stýdentterdiń praktikalyq daǵdylaryn nyǵaityp, olardy naqty problemalardy sheshýge baǵyttaitynyn atap ótti.
