Memleket basshysy Qasym-Jomart Toqaevtyń málimdemesinde aitylǵan daǵdarysqa qarsy sharalar elimizdegi basty qundylyq – halyqtyń áleýmettik jaǵdaiy ekendigin bildiredi. Abai atyndaǵy Qazaq ulttyq pedagogikalyq ýniversitetiniń rektory Takir Balyqbaev bólisti, dep habarlaidy QazAqparat.
«Búkil álemge taraǵan koronavirýs pandemiiasyna bailanysty Memleket basshysynyń, Úkimettiń qolǵa alǵan aldyn alý sharalarynan bastap, odan keiingi kómek berý sharalarynyń barlyǵy halyqtyń búgingi jaǵdaiyn tolyq túsinýdiń nátijesi dep bilemin. Ekinshiden, Prezidenttiń sońǵy úndeýine qatysty aitar bolsam, ondaǵy eń mańyzdysy, osy áleýmettik jaǵdaiy tómen nemese jumysynan airylǵan jandardy qoldaýǵa arnalǵan sharalar dep oilaimyn. Bir jaǵynan karantin sharasy el densaýlyǵyna paidaly bolsa, ekinshi jaǵynan ekonomikalyq sýbektilerge, ásirese ShOB sýbektilerine áser etip jatyr. Kóptegen adamdar kúndelikti tabysynan aiyryldy. Osy oraida, birinshiden, zeinetkerlerge, basqa da áleýmettik kómek alatyn tulǵalarǵa 10 paiyzdyq indeksatsiia búgingi ekonomikalyq jaǵdaiǵa bailanysty qoldaý bolyp otyr. Odan bólek, Úkimet jumyssyz qalǵan halyqty da umytyp jatqan joq. Osy ýaqytta qyzmetinen aiyrylǵan adamdarǵa berilip jatqan eń tómengi jalaqy mólsherindegi 42 500 teńge kómekti 3 mln jýyq adam alatyn bolsa – úlken kómek. Tipti, basqa jumys tabý týraly jergilikti ákimderge, basshylyq organdarǵa tapsyrma berildi. 85 myńdai kótermeaqy beriletin boldy. Osynyń barlyǵy qazirgi qiyn halde qalǵan halyqqa kómek dep túsinemin», - dedi Takir Balyqbaev.
Rektordyń aitýynsha, qazir Qazaq ulttyq pedagogikalyq ýniversitetinde oqytýshylardyń, qyzmetkerlerdiń jumys ornyn saqtap qalý mańyzdy bolyp otyr.
«Endi, bilim salasyna kelsek, aldyn ala aitylǵan sharalar boiynsha naýryzdyń 16-nan bastap JOO qashyqtan oqý formatyna kóshti. Onyń negizgi ideiasy birinshiden, jastarymyzdyń, oqýshylardyń, stýdentterdiń, muǵalimderdiń densaýlyǵyn oilaý. Qazir árkimniń úiinen shyqpai bilim alýyna tolyq múmkindik bar. Biz sol múmkindikti paidalanyp otyrmyz. Bizdiń oqý ornynda 10 myńnan astam stýdent, magistrant, doktorant bar. 2000 qyzmetker pedagog, oqytýshylar úilerinen jumys istep jatyr. Aqyly bólimde oqityn stýdentterdiń oqý aqysyn tóleýdi mamyrǵa deiin toqtatyp otyrmyz. Oqý ornynda 2000 jýyq qyzmetker bar. Olardyń jalaqysyn da tóleý kerek. Sol sebepti, jeńildik máselesine kelgende ár stýdenttiń máselesine jeke qaraityn bolamyz», - dedi rektor.
.jpeg)