Foto: gov.kz
IIM kólik júrgizýshilerin daiarlaý kýrstaryna qatysty málimdeme jasady, – dep habarlaidy Ult.kz Polisia.kz saityna silteme jasap.
Ishki ister ministrligi internet pen áleýmettik jelilerde júrgizýshilerdi jedel onlain kýrstar arqyly daiarlaý jóninde taralyp jatqan usynystarǵa bailanysty resmi túsindirme jasady.
Vedomstvonyń málimetinshe, bolashaq júrgizýshiler avtomektepte tolyq oqý kýrsynan ótýi tiis. Bul kýrstyń quramyna mindetti túrde praktikalyq sabaqtar kiredi. Júrgizý daǵdylaryn tek onlain formatta tolyq meńgerý múmkin emes.
IIM Ákimshilik politsiia komiteti tóraǵasynyń orynbasary Álibek Keńispaevtyń aitýynsha, júrgizý daǵdylary naqty jol jaǵdaiynda ǵana qalyptasady. Onlain kýrstar tolyqqandy oqytýdy almastyra almaidy.
Sondai-aq ministrlikte avtomektepti aiaqtaǵanyn rastaityn qaǵaz túrindegi kýálikti alý talap etilmeitini atap ótildi. Oqý týraly málimetter arnaiy aqparattyq júieler arqyly halyqqa qyzmet kórsetý ortalyqtaryna elektrondy túrde joldanady.
IIM ókilderi júrgizýshilerdi daiarlaý sapasy jol qaýipsizdigine tikelei áser etetinin eskertedi. Osyǵan bailanysty azamattardy oqý máselesine jaýapkershilikpen qarap, kúmándi ári zań talaptaryna sai kelmeitin usynystarǵa senbeýge shaqyrady.
