Memleket basshysy Nursultan Nazarbaevtyń halyqqa arnaǵan ótken jylǵy Joldaýy elimizdiń áleýmettik-ekonomikalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterin qamtidy. Joldaýdy árbir qazaqstandyqqa jetkizýde jáne iske asyrýda barshamyzdy úlken jumys kútip tur.
Bir jyl aiaqtalyp, kelesi jyl bastalarda Prezidenttiń halqymyzǵa Joldaýyn taǵatsyzdana kútý táýelsizdik alǵan kezeńnen beri dástúrge ainaldy desek, artyq aitqandyq emes. Óitkeni, bul qaryshtap damyǵan memleketimizdiń ótken belesine tereń taldaý jasap, aldaǵy ýaqytta júrer jolymyzdyń baǵyt-baǵdaryn aiqyndap beretin mańyzdy qujat.
Ekonomikasy qarqyndy damyp kele jatqan zamanaýi progressivti memleket quryp, beibitshilik pen qoǵamdyq kelisimdi qamtamasyz ettik. Elbasynyń Joldaýyndaǵy mindetter kóńilge qýanysh darytyp, nyq sezim ornyqtyrdy. Budan keiin Prezident sol qarqyndy damýdyń qadaý-qadaý belesterin atap ótip, qazaqstandyqtardyń ál-aýqatynyń ósýi basty basymdyqqa ainalýy tiis ekendigine erekshe toqtaldy. Buǵan deiingi Joldaýlarda da osy másele basty nazarda turatyn, biraq osy joly Elbasynyń sózin tyńdaǵanda oǵan airyqsha sipat berilgendiginiń kýási boldyq.
Biylǵy jyldyń 1 qańtarynan bastap eń tómengi jalaqynyń 1,5 ese, al, biýdjettik mekemelerde jumys isteitin 275 myń qyzmetkerdiń eńbekaqysy orta eseppen 35 paiyzǵa óskendigi óte úlken is. Óitkeni, ózimiz ómir boiy osy salada jumys istegennen keiin jaqsy bilemiz – mundaǵy adamdardyń jalǵyz jalaqysynan basqa otbasyna keler túsimi joq qoi. Endeshe bul memleket kómeginiń jańa sapaly satyǵa kóterilgendiginiń bir aiǵaǵy bolsa kerek.
Biýdjettik sala degende eń alǵash aýyzǵa túsetini, árine, bilim jáne densaýlyq saqtaý baǵyttary. Ustazdar men dárigerlerdiń órkenietti elderdegidei jalpy qoǵamdaǵy salmaǵyn arttyrý, birinshi rette olardyń bedelin, eńbekaqysyn kóterý qajettigi jóninde az aitylmaýshy edi. Joldaýda bul týraly óte aýqymdy sharalar belgilendi. Aldymen biyl «Pedagog mártebesi týraly» zań qabyldanatyny ustazdar qaýymy úshin tipti tarihi oqiǵa bolary haq desek, asyra aitqandyq bolmas. Sebebi, ol zańda jańaǵy aitylyp júrgen áńgimelerimizdiń barlyǵy oń sheshimin tabady dep úmittenemiz.
Al endi, 2019 jyldyń 1 qańtarynan bastap aýrýlardy emdeý isin basqarýdyń jańa tásilderin engizgen ýchaskelik meditsina qyzmetkerleriniń jalaqysyn kezeń-kezeńmen 20 paiyzǵa ósirý – bul da osy sala jumyskerlerin erekshe yntalandyrý bolmaq. Yntaly eńbek bar jerde sapaly nátije bolatyndyǵyn eskersek, atalmysh shara kóp synǵa ushyrap júrgen densaýlyq saqtaý júiesin joǵary satyǵa kóteretin bir shynaiy tetikke ainalar edi dep senemiz.
Joldaýda ekonomikany jetildirý, ómir súrýge jaily orta qalyptastyrý, azamattar suranysyna beiimdelgen memlekettik apparat, tiimdi syrtqy saiasat, árbir qazaqstandyqtyń elimizdegi ózgerister úderisterine atsalysýy siiaqty basqa da máselelerge qatysty tereń, halyq kóńilinen shyqqan keleli oilar aitylǵan. Bular – aldaǵy atqarylar ulan-ǵaiyr sharýalardyń naqty baǵdarlary. Al, aldaǵy ýaqyt, bolashaq degende sanamyzda birinshi rette jastar turary, jańaǵy eresen jumystardy júzege asyratyn eleýli kúshterdiń biri solar ekendigi anyq. Sondyqtan, Elbasy jastar men otbasy institýtyn keshendi qoldaý memlekettik saiasattyń basymdyǵyna ainalýy tiis dep oryndy aitty. Kelesi jyldy Jastar jyly dep jariialaý – barsha zamandastarymyzdyń oiynan shyqqan tujyrym boldy.
Endigi kezeńde árine, osynaý mańyzdy qujattyń tereń máni búge-shúgesine deiin ár zamandasymyzdyń oiyna jetkizilýi kerek, bul turǵyda úlken ideologiialyq jumys kútip tur. Óitkeni, qandai da bolmasyn ideia adamdardyń sanasyna sińirilgende ǵana jasampaz kúsh-qýatqa ainalatyny belgili. Al, kúni keshe jariialanǵan Joldaý rýhani jańǵyrý ústindegi qoǵamymyzdyń áleýetin eselei túsetin qujat ekeni kúmánsiz.
Ǵosman TÓLEǴUL,
Aqmola oblystyq
ardagerler keńesiniń tóraǵasy.
.jpeg)