Joldaýda qamtylǵan baǵyttar eldegi saiasi turaqtylyqty saqtaýǵa kepil bolady. Mundai paiymdy Prezident Joldaýyna qatysty pikir bildirgen «Qazaqstandyq qoǵamdyq damý institýty» basqarma tóraǵasy Qazbek Maigeldinov bildirdi, dep habarlaidy QazAqparat.
«Joldaýda jer telimderin paidalaný, sý resýrstaryna bailanysty máseleler men kásipkerlikti damytýǵa basa nazar aýdaryldy. Munyń nátijesin qarapaiym halyq aitarlyqtai sezinetin bolady. Máselen, eń tómengi jalaqyny 70 myńǵa deiin kóbeitý tapsyryldy. Sonymen qatar, áielderdiń zeinetke shyǵý jasyn 2028 jylǵa deiin 61 jas etip bekitý usynyldy. Bul óz kezeginde kez kelgen qazaqstandyqqa tikelei áser etetin bastama dep aitýǵa bolady», - dep atap ótti «Qazaqstandyq qoǵamdyq damý institýty» basqarma tóraǵasy.
Qazbek Maigeldinovtiń pikirinshe, Joldaýda aitylǵan bastamalar men júktelgen tapsyrmalar eldiń turaqty damýyna kepil bolmaq.
«Jalpy búgingi Joldaýdyń basty tetigi – Ádiletti Qazaqstan. Árbir qamtylǵan baǵyt eldegi saiasi turaqtylyqty saqtaý úshin jasalyp jatyr. Iaǵni, ishki turaqtylyqqa kepil bolady dep oilaimyn. Sonymen birge, atqarýshy bilik, Úkimetke de syn aityldy. Kez kelgen bastamany júzege asyrýshy – ol Úkimet. Osyǵan sai, aldaǵy ýaqytta jergilikti basqarýshy organdardyń jumysy ońtailandyrylady», - dedi Qazbek Maigeldinov.
