Biyl respýblikalyq mańyzy bar avtomobil joldaryn jóndeý jáne kútip ustaýǵa 86 mlrd teńge bólindi. Bul týraly Ortalyq kommýnikatsiialar qyzmetindegi brifingte QR IIDM Avtomobil joldary komitetiniń tóraǵasy Sairanbek Barmaqov aitty, dep habarlaidy QazAqparat.
«Biyl respýblikalyq mańyzy bar avtomobil joldaryn jóndeý jáne atalǵan joldardy kútip ustaýǵa 86 mlrd teńge bólindi. Kúrdeli jóndeý jumystarmen joldardyń 440 shaqyrymy qamtylyp otyr. Onyń 62 shaqyrymy paidalanýǵa beriledi dep josparlanǵan. Kúrdeli jóndeý jumystarynyń aiasynda barlyǵy 23 joba iske asyrylyp jatyr. Ortasha jóndeý jumystarymen avtomobil joldarynyń 1079 shaqyrymy qamtylǵan. Ortasha jóndeý jumystarynyń aiasynda 65 joba iske asyrylýda», - dedi ol.
Onyń aitýynsha, respýblikalyq mańyzy bar joldarda eki ai ishinde shuńqyrlardy jamaý, jol belgilerin ornatý jáne aýystyrý, sondai-aq joldardyń qozǵalys bóligin tańbalaý siiaqty jumystardyń jyldyq kóleminiń kem degende 60 paiyzy oryndalmaq. Bul jumystar 15 sáýir men 15 maýsym aralyǵynda elimizdiń ońtústik óńirlerinde atap aitqanda, Almaty, Atyraý, Jambyl, Qyzylorda, Mańǵystaý jáne Túrkistan oblystarynda, 1 mamyr men 1 shilde aralyǵynda elimizdiń soltústik aimaqtaryndaǵy Aqmola, Aqtóbe, Batys Qazaqstan, Shyǵys Qazaqstan, Qaraǵandy, Qostanai, Pavlodar jáne Soltústik Qazaqstan oblystarynda júrgiziletin bolady.
«Avtomobil joldaryn kútip ustaý aiasyndaǵy jumystardyń barlyǵy josparlanǵan kestege sáikes júrgizilýde. Jumysshylar sanitarlyq-epidemiologiialyq erejelerdiń barlyǵyn qatań saqtaidy», - dedi komitet basshysy.
