Qyrǵyz parlamenti - Jogorký Keńesh kezekten tys otyrysynda el premer-ministri retinde Sadyr Japarovty sailady. Parlamenttiń birinshi vitse-spikeri Mirlan Bakirov Japarovtyń biraýyzdan maquldanǵanyn aitty. Otyrys basynda parlamenttegi 120 depýtattyń 51-i ǵana qatysyp otyrǵany, on depýtattyń senimhat jibergeni belgili boldy.
Azattyqtyń Qyrǵyz qyzmeti habarlaǵandai, depýtattar ministrler kabinetiniń qurylymyn, quramyn jáne baǵdarlamasyn biraýyzdan qabyldaǵan.
Jiyn barysynda Japarov premer-ministrlikke jalǵyz kandidat bolǵan. Ol qazirgi jaǵdaiǵa bailanysty úkimet quramynyń ózgerissiz qalatynyn málimdedi. Premer sondai-aq Kýmtor ken ornyn ulttandyrý ideiasynan bas tartatynyn aitty. "Segiz jyl buryn ulttandyrý kerek edi, qazir ol jerde altyn qalmady" dedi ol.
Sadyr Japarov – Jogorký Keńeshtiń burynǵy depýtaty. 2017 jyly Bishkek soty ony 2013 jyly Qarakólde bolǵan mitingini uiymdastyrdy jáne Ystyq-Kól oblysynyń sol kezdegi basshysyn kepilge aldy dep 11,5 jylǵa sottaǵan. Miting kezinde Kýmtor ken ornyn ulttandyrý talap etilgen. Japarov kúsheitilgen tártiptegi koloniiada qamaýda bolǵan. 6 qazanǵa qaraǵan túni demonstranttar ony bosatyp aldy.
Sol kúni demonstranttar jemqorlyq aiybymen 11 jylǵy sottalǵan burynǵy prezident Almazbek Atambaevty da bosatyp alǵan. Parlament otyrysy bastalardyń aldynda ony taǵy da qamady.
6 qazan kúni Qyrǵyz parlamenti Japarovty premer-ministr qylyp sailap úlgergen. Biraq parlament quramynyń tolyq bolmaýy oppozitsiianyń bul sheshimdi daýlaýyna ákeldi. Saldarynan oppozitsiia jikke bólinip, eki koordinatsiialyq keńes quryldy. Biri Japarovty jaqtady. 9 qazan kúni tańerteń "Respýblika", "Ata Meken", "Bir Bol" jáne "Reforma" partiialarynyń jetekshileri premer-ministrlikke oppozitsiialyq saiasatker Omýrbek Babanovty usyndy.
Bul saiasi kúshterdiń mitingi tártipsizdikke ulasty. Tártipsizdikke túrtki bolǵan Japarovtyń jaqtastary degen aqpar tarady. Onyń saldarynan birneshe adam jaraqattandy. Olardyń qatarynda premer-ministrlikke usynylǵan Tilek Toktogaziev te bar. Ol qazir aýrýhanada jatyr.
Qyrǵyzstanda ne bolyp jatyr?
4 qazanda Qyrǵyzstanda parlament sailaýy ótip, resmi qorytyndysy boiynsha, bilikke jaqyn úsh partiia men oppozitsiiadan bir ǵana partiia Jogorký keńeshten oryn aldy.
5 qazanda basqa oppozitsiialyq partiialar men jurt sailaý nátijesimen kelispei qarsylyq aktsiiasyna shyqty. Narazylar "bilikke jaqyn partiialar jurttyń daýysyn satyp aldy, ákimshilik resýrstardy paidalandy" deidi. Olar parlament pen prezident otyratyn "Aq úidi" basyp alyp, sailaýdy qaita ótkizýdi, el prezidenti Sooronbai Jeenbekovtiń bilikten ketýin talap etti. "Jemqorlyq aiybymen" qamalǵan eldiń eks-prezidenti Almazbek Atambaevty jaqtastary túrmeden bosatyp aldy.
6 qazanda Ortalyq sailaý komissiiasy daýly sailaýdyń nátijesin joidy. Elde saiasi daǵdarys áli jalǵasyp jatyr.
