قىرعىز پارلامەنتٸ - جوگوركۋ كەڭەش كەزەكتەن تىس وتىرىسىندا ەل پرەمەر-مينيسترٸ رەتٸندە سادىر جاپاروۆتى سايلادى. پارلامەنتتٸڭ بٸرٸنشٸ ۆيتسە-سپيكەرٸ ميرلان باكيروۆ جاپاروۆتىڭ بٸراۋىزدان ماقۇلدانعانىن ايتتى. وتىرىس باسىندا پارلامەنتتەگٸ 120 دەپۋتاتتىڭ 51-ٸ عانا قاتىسىپ وتىرعانى, ون دەپۋتاتتىڭ سەنٸمحات جٸبەرگەنٸ بەلگٸلٸ بولدى.
ازاتتىقتىڭ قىرعىز قىزمەتٸ حابارلاعانداي, دەپۋتاتتار مينيسترلەر كابينەتٸنٸڭ قۇرىلىمىن, قۇرامىن جەنە باعدارلاماسىن بٸراۋىزدان قابىلداعان.
جيىن بارىسىندا جاپاروۆ پرەمەر-مينيسترلٸككە جالعىز كانديدات بولعان. ول قازٸرگٸ جاعدايعا بايلانىستى ٷكٸمەت قۇرامىنىڭ ٶزگەرٸسسٸز قالاتىنىن مەلٸمدەدٸ. پرەمەر سونداي-اق كۋمتور كەن ورنىن ۇلتتاندىرۋ يدەياسىنان باس تارتاتىنىن ايتتى. "سەگٸز جىل بۇرىن ۇلتتاندىرۋ كەرەك ەدٸ, قازٸر ول جەردە التىن قالمادى" دەدٸ ول.
سادىر جاپاروۆ – جوگوركۋ كەڭەشتٸڭ بۇرىنعى دەپۋتاتى. 2017 جىلى بٸشكەك سوتى ونى 2013 جىلى قاراكٶلدە بولعان ميتينگٸنٸ ۇيىمداستىردى جەنە ىستىق-كٶل وبلىسىنىڭ سول كەزدەگٸ باسشىسىن كەپٸلگە الدى دەپ 11,5 جىلعا سوتتاعان. ميتينگ كەزٸندە كۋمتور كەن ورنىن ۇلتتاندىرۋ تالاپ ەتٸلگەن. جاپاروۆ كٷشەيتٸلگەن تەرتٸپتەگٸ كولونييادا قاماۋدا بولعان. 6 قازانعا قاراعان تٷنٸ دەمونسترانتتار ونى بوساتىپ الدى.
سول كٷنٸ دەمونسترانتتار جەمقورلىق ايىبىمەن 11 جىلعى سوتتالعان بۇرىنعى پرەزيدەنت المازبەك اتامباەۆتى دا بوساتىپ العان. پارلامەنت وتىرىسى باستالاردىڭ الدىندا ونى تاعى دا قامادى.
6 قازان كٷنٸ قىرعىز پارلامەنتٸ جاپاروۆتى پرەمەر-مينيستر قىلىپ سايلاپ ٷلگەرگەن. بٸراق پارلامەنت قۇرامىنىڭ تولىق بولماۋى وپپوزيتسييانىڭ بۇل شەشٸمدٸ داۋلاۋىنا ەكەلدٸ. سالدارىنان وپپوزيتسييا جٸككە بٶلٸنٸپ, ەكٸ كوورديناتسييالىق كەڭەس قۇرىلدى. بٸرٸ جاپاروۆتى جاقتادى. 9 قازان كٷنٸ تاڭەرتەڭ "رەسپۋبليكا", "اتا مەكەن", "بير بول" جەنە "رەفورما" پارتييالارىنىڭ جەتەكشٸلەرٸ پرەمەر-مينيسترلٸككە وپپوزيتسييالىق ساياساتكەر ومۋربەك بابانوۆتى ۇسىندى.
بۇل ساياسي كٷشتەردٸڭ ميتينگٸ تەرتٸپسٸزدٸككە ۇلاستى. تەرتٸپسٸزدٸككە تٷرتكٸ بولعان جاپاروۆتىڭ جاقتاستارى دەگەن اقپار تارادى. ونىڭ سالدارىنان بٸرنەشە ادام جاراقاتتاندى. ولاردىڭ قاتارىندا پرەمەر-مينيسترلٸككە ۇسىنىلعان تٸلەك توكتوگازيەۆ تە بار. ول قازٸر اۋرۋحانادا جاتىر.
قىرعىزستاندا نە بولىپ جاتىر?
4 قازاندا قىرعىزستاندا پارلامەنت سايلاۋى ٶتٸپ, رەسمي قورىتىندىسى بويىنشا, بيلٸككە جاقىن ٷش پارتييا مەن وپپوزيتسييادان بٸر عانا پارتييا جوگوركۋ كەڭەشتەن ورىن الدى.
5 قازاندا باسقا وپپوزيتسييالىق پارتييالار مەن جۇرت سايلاۋ نەتيجەسٸمەن كەلٸسپەي قارسىلىق اكتسيياسىنا شىقتى. نارازىلار "بيلٸككە جاقىن پارتييالار جۇرتتىڭ داۋىسىن ساتىپ الدى, ەكٸمشٸلٸك رەسۋرستاردى پايدالاندى" دەيدٸ. ولار پارلامەنت پەن پرەزيدەنت وتىراتىن "اق ٷيدٸ" باسىپ الىپ, سايلاۋدى قايتا ٶتكٸزۋدٸ, ەل پرەزيدەنتٸ سوورونباي جەەنبەكوۆتٸڭ بيلٸكتەن كەتۋٸن تالاپ ەتتٸ. "جەمقورلىق ايىبىمەن" قامالعان ەلدٸڭ ەكس-پرەزيدەنتٸ المازبەك اتامباەۆتى جاقتاستارى تٷرمەدەن بوساتىپ الدى.
6 قازاندا ورتالىق سايلاۋ كوميسسيياسى داۋلى سايلاۋدىڭ نەتيجەسٸن جويدى. ەلدە ساياسي داعدارىس ەلٸ جالعاسىپ جاتىر.
