Joǵary oqý orny stýdentteri dástúrli oqý rejimine qashan kóshetini QR Densaýlyq saqtaý ministrligimen birlese otyryp sheshiledi. Bul týraly Ortalyq kommýnikatsiialar qyzmetinde ótken brifingide aityldy, dep habarlaidy QazAqparat.
«Stýdentterdiń qashan dástúrli oqý rejiminde oqitynyn quziretti organdar sheshedi. Bári de epidemiologiialyq jaǵdaiǵa bailanysty. Al óz atymnan aitar bolsam, Bilim jáne ǵylym ministrligi de, joǵary oqý oryndary da dástúrli rejimde oqýǵa daiyn», - deidi QR Bilim jáne ǵylym ministrligi Bilim jáne ǵylym salasyndaǵy sapany qamtamasyz etý komitetiniń tóraiymy Gúlzat Kóbenova.
Bilim jáne ǵylym vitse-ministri Sholpan Karinovanyń aitýynsha, aldymen aralas, odan keiin dástúrli oqý rejimine kóshetinimizdi, iaǵni bári kezeń-kezeńimen bolatyny aldyn ala eskertilgen.
«Mundai jaǵdai elimiz boiynsha da, álem boiynsha da birinshi ret oryn alyp otyrǵanyna kelisetin shyǵarsyzdar. Sondyqtan dástúrli rejimde oqytý týraly sheshim kezeń-kezeńimen júzege asady. Ázirge tek 1-5 synyp oqýshylary ǵana aralas rejimde oqityny siiaqty, barlyq mekemede de osylai kezeń-kezeńimen sheshim qabyldanady. Biz bul máseleni QR Densaýlyq saqtaý ministrligimen birlese otyryp sheshemiz. Buǵan qatysty naqty ereje joq, bári elimizdegi epidemiologiialyq jaǵdaiǵa bailanysty bolmaq», - deidi ol.
