Búgin Nurlan Ábdirovtiń tóraǵalyǵymen Ortalyq sailaý komissiiasynyń otyrysy ótti, - dep habarlaidy "Ult aqparat".
Otyrysta kelesi máseleler qaraldy:
1. «2022 jylǵy 20 qarashaǵa taǵaiyndalǵan Qazaqstan Respýblikasy Prezidentiniń kezekten tys sailaýyna halyqaralyq uiymdar men shet memlekettiń baiqaýshylaryn akkreditteý týraly»
2. «Jigýli Moldahalyquly Dairabaevty 2022 jylǵy 20 qarashaǵa taǵaiyndalǵan Qazaqstan Respýblikasy Prezidentiniń kezekten tys sailaýynda Qazaqstan Respýblikasynyń Prezidenttigine kandidat retinde tirkeý týraly».
Kún tártibiniń birinshi máselesi boiynsha Ortsailaýkom Hatshysy Muhtar Erman baiandady. Ol OSK Halyqaralyq baiqaý institýtyn 2022 jyldyń 22 qyrkúieginde ashqanyn málimdedi. Halyqaralyq baiqaýshylardy akkreditteý 14 qarasha saǵat 18:00-de aiaqtalady.
Syrtqy ister ministrliginiń usynysy boiynsha akkreditteýge tórt halyqaralyq uiymnan jáne bir shet memleketten 43 baiqaýshy usynylǵan. Onyń ishinde: 6 baiqaýshy TMD baiqaýshylar missiiasynyń quramynda, 17 baiqaýshy - TMD PAA-dan, 13 baiqaýshy - EQYU/DIAQB missiiasy, 5 baiqaýshy - Túrki memleketteri uiymy baiqaýshylar missiiasynan, sondai-aq Grýziia elinen 2 baiqaýshy akkreditteldi. Akkreditteýge usynystardyń kelip túsýine qarai baiqaýshylar jónindegi derekter jańartylyp otyrady.
Baiandama qorytyndysy boiynsha QR OSK «Halyqaralyq uiymdar men shet memlekettiń baiqaýshylaryn 2022 jylǵy 20 qarashaǵa taǵaiyndalǵan Qazaqstan Respýblikasy Prezidentiniń kezekten tys sailaýyna akkreditteý týraly» qaýly qabyldady.
"Jigýli Moldahalyquly Dairabaevty tirkeý máselesi boiynsha Ortsailaýkom múshesi Asylbek Smaǵulov baiandama jasady. Ol 2022 jyldyń 5 qazanynda Ortalyq sailaý komissiiasyna «Aýyl» Halyqtyq-demokratiialyq patriottyq partiiasy» qoǵamdyq birlestigi J.M. Dairabaevty Qazaqstan Respýblikasynyń Prezidenttigine kandidat etip usyný týraly qujattardy usynǵanyn habarlady. Ortalyq sailaý komissiiasyna kandidatty tirkeý úshin mynadai qujattar usynyldy:
- Prezidenttikke kandidat J.M. Dairabaevtyń jáne onyń zaiybynyń aktivter men mindettemeler jóninde deklaratsiialar tapsyrǵany týraly memlekettik kirister organynyń anyqtamasy;
- Prezidenttikke kandidat J.M. Dairabaevtyń ony tirkeýge kedergi keltiretin aýrýlardyń joqtyǵy týraly meditsinalyq qorytyndysy;
- oblystardyń, respýblikalyq mańyzy bar qalalardyń jáne Qazaqstan Respýblikasy astanasynyń aýmaqtyq sailaý komissiialarynyń Prezidenttikke kandidat J.M. Dairabaevty qoldap jinalǵan azamattardyń qoldaryn tekserý nátijeleri týraly hattamalary.
Osy hattamalarǵa sáikes Prezidenttikke kandidat J. M. Dairabaevty qoldaý maqsatynda Qazaqstannyń barlyq 20 óńirinen 125 081 azamattyń qoly jinaldy. Tekserý nátijesinde 119 975 qol ras dep tanyldy, iaǵni qajetti sany qamtamasyz etildi, bul sailaýshylardyń jalpy sanynyń keminde 1% nemese 118 273-i.
J.M. Dairabaevty Prezidenttikke kandidat retinde tirkeýge qajetti barlyq qujattar Ortalyq sailaý komissiiasyna usynyldy jáne olarǵa qoiylatyn talaptarǵa tolyq sáikes keledi" - delingen habarlamada.
QR OSK qaýlysymen Jigýli Moldahalyquly Dairabaev 2022 jylǵy 20 qarashaǵa taǵaiyndalǵan Qazaqstan Respýblikasy Prezidentiniń kezekten tys sailaýynda Qazaqstan Respýblikasynyń Prezidenttigine kandidat bolyp tirkelip, oǵan tiisti kýálik berildi.
