Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-mýzeiiniń «Abai murasy – rýhani qazyna» atty kóshpeli kórmesi Aqtóbege ákelindi. Endi bir ai boiy aqtóbelikter aqynnyń murasymen tanysa alady, dep habarlaidy "Ult aqparat".
Uly aqyn Abaidyń 175 jyldyǵyna orai Aqtóbe oblystyq mádeniet, arhivter jáne qujattama basqarmasynyń qoldaýymen Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-mýzeiiniń «Abai murasy – rýhani qazyna» atty kórmesi ashyldy.
«Abaidyń ómiri men shyǵarmashyǵyna qatysty qundy derektermen tanysyp, mýzykalyq murasy, qoǵamdyq qyzmeti, Qunanbai Óskenbaiuly týraly muraǵat derekterin oqyp, kórýge bolady. Kórmege 100-den astam jádiger ákelindi. Munda Abai alaqanynyń taby qalǵan qundy dúnieler bar. Olar: eri, kise belbeý, toǵyzqumalaq taqtasy. 1885 jyly Semeidegi tarihi-ólketaný mýzeiine Abaidyń ózi tapsyrǵan asataiaq, sybyzǵy, HIH ǵasyrda paidalanylǵan daýylpaz syndy mýzykalyq aspaptary da jetkizildi. Kórmede Abai bilim alǵan Semei qalasyndaǵy Ahmet Riza meshit-medresesiniń oqýlyqtary bar. Bul HIH ǵasyrdaǵy Orta Aziia elderinde jaryq kórgen oqýlyqtar men tanymdyq kitaptar», - dedi mýzeidiń aǵa ǵylymi qyzmetkeri Qýat Qiyqbai.
Aita keteiik, Abaidyń ádebi-memorialdyq mýzeii M.Áýezovtiń usynysy boiynsha aqynnyń týǵanyna 95 jyl tolý qarsańynda Qazaq KSR-niń Halyq Komissarlar keńesiniń qaýlysy negizinde quryldy. Qazaqstan tarihyndaǵy tuńǵysh ádebi mýzei. 1990 jyly Abaidyń 145 jyldyq mereitoiyna orai Qazaq KSR Ministrler keńesiniń qaýlysymen «Jidebai-Bórili» memlekettik tarihi-mádeni jáne ádebi-memorialdyq qoryq-mýzeii bolyp quryldy. Qoryq-mýzeidiń negizgi qoryn 1885 jyly Abaidyń ólketaný mýzeiine tapsyrǵan zattary quraidy.
