Jezqazǵan turǵyndary Sarysý ózenindegi balyqtyń jappai qyrylýyna bailanysty dabyl qaqty, - dep habarlaidy kaz.tengrinews.kz tilshisi.
Túiemoinaq bógeti mańyndaǵy balyqtardyń jappai qyrylyp jatqany týraly videony jergilikti turǵyndar túsirgen. Al Facebook qoldanýshysy Aleksandr Galaev videony óz paraqshasynda jariialap, kómek suraǵan.
"Dostar Qazaqstanǵa kimniń jany ashysa, repost! Qaraǵandy oblysynda reseilikter men belorýstar altyn men kúmis óndiretin zaýyt salǵan, al qyshqyldyqty óńirdegi eń úlken ózenge Sarysýǵa tógip jatyr! Bárin ýlap bitti!", - dep jazypty avtor.
Onyń aitýynsha, alǵashqy videony ol WhatsApp messendjerinen kórgen. Al qalǵan eki videony onyń balyqshy dostary túsirgen. Alǵashqy videoda Sarysý ózeniniń jaǵasynda qyrylyp jatqan balyqtar túsirilgen. Sonymen birge, ózen sýynyń túsi basqa ekenin kórýge bolady. Rolik avtorynyń sózinshe, ózende balyqty ýlap jatqan qyshqyldyqty altyn kenin óńdeitin zaýyt tógip jatyr.
Qaraǵandy oblysynyń orman sharýashylyǵy jáne janýarlar dúniesi aýmaqtyq inspektsiiasy osyǵan qatysty túsinik berdi. Inspektsiia jetekshisiniń orynbasary Abai Áljanovtyń aitýynsha, bul jaǵdaidyń anyq-qanyǵyn bilip, balyqtyń ne sebepti qyrylǵanyn anyqtaý úshin oqiǵa ornyna mamandar jóneltildi.
"Bul derek boiynsha Ulytaý aýdanyna "Qaraǵandy oblysynyń orman sharýashylyǵy jáne janýarlar dúniesi aýmaqtyq inspektsiiasy" jáne "Qaraǵandy oblysynyń Ekologiia jónindegi departament" qyzmetkerleri attandy. Sonymen qatar, ol jerge oblystyq IID-niń Jergilikti politsiia qyzmetiniń ókilderi de bardy. Jaǵdaidyń mán-jaiy anyqtalady. Kerekti saraptamalar jasalady. Qorytyndylar keiin qosymsha habarlanatyn bolady", - deidi Áljanov.
