Jezqazǵan qalasynda ańyz tulǵa, jyraý, kúshi, qolbasshy Ketbuqa babaǵa eskertkish ornatyldy. Bul týraly jergilikti «Saryarqa» gazeti habarlady.
Oktiabr Sekemanovtyń jetekshiligimen, músinshiler Asqar Nartov pen Serik Rústembekovtiń qiialynan týyndap, qoldarymen somdalǵan músin uly jyraýdyń ańyz bolyp jetken beinesin barynsha asqaqtatyp tur. Eskertkishtiń ózi qoladan quiylyp, tuǵyry granitpen qaptalǵan. Jalpy biiktigi - 10,5 metr. Eskertkishtiń ashylý saltanatyna alys-jaqynnan kelgen halyq kóp boldy. S. Qojamqulov atyndaǵy mýzykalyq drama teatr ártisteriniń kúshimen qoiylǵan kórinis Ketbuqa baba ómirinen syr shertti.
«Biz tarihi tulǵalarymyzdy tanymai, dáriptemei, uly tarihymyzǵa úńilmei - alǵa basa almaimyz. Bul týraly Elbasy da únemi aityp otyrady. Óitkeni, 800 jyl boiy óziniń laiyqty baǵasyn ala almai kelgen babamyzdyń eskertkishi búgin úlken shahardyń qaq ortasyna ornatyldy. Kezinde ózi san márte jortqan, izi qalǵan Ulytaý óńirine Ketbuqa tulparymen kelip, tuǵyrǵa qonýy aqylǵa qonymdy, tarihi zańdylyq», - dedi oblys ákimi Erlan Qoshanov eskertkishtiń ashylý saltanatynda.
Oblys basshysy óz sózinde buryn Ketbuqa esimin kópshilk kúishi ǵana retinde biletinin, al búgin zertteýshiler babamyzdyń jyraý, aqyn, bi, sheshen, batyr bolǵanyn dáleldep otyrǵanyn jetkizdi. «Qazaqmys» korporatsiiasy» JShS Basqarý keńesiniń bas direktory Baqtiiar Ábdirahmanuly, Qazaqstannyń Halyq Qaharmany Muhtar Altynbaev jerlesterin baba eskertkishiniń ashylýymen quttyqtady.
