Jol-kólik oqiǵasynan qaza bolǵan júrgizýshiniń uialy telefonyn urlaǵan eki politsei sottaldy. Jezqazǵan qalalyq soty urlyq, laýazymdyq ókilettikterin asyra paidalaný jáne alaiaqtyq jasady degen aiyppen ustalǵan burynǵy tártip saqshylaryna úkim shyǵardy, dep habarlaidy "Ult aqparat".
Ótken jyldyń kókteminde Jergilikti politsiia basqarmasynyń eki kriminalisti jol apaty bolǵan Jezqazǵan – Sátbaev jolyna shaqyrtylǵan. Oqiǵa ornynda politsiia qyzmetkerleri qaza tapqan júrgizýshiniń uialy telefonyn taýyp alǵan. Ony zattai dálel retinde tapsyrýdyń ornyna politsei telefondy alyp ketken. Keiin mobildik qosymsha arqyly telefon iesiniń atyna mikrokreditter resimdegen. Sońyra shotqa túsken aqshany dosynyń kartasyna aýdarǵan.
Biraz ýaqyttan keiin olardyń alaiaqtyq áreketi anyqtaldy. Kúdiktiler prokýrormen is júrgizý kelisimin jasap, óz kinásin tolyq moiyndady. Jezqazǵan qalalyq soty olardy 3,6 jylǵa bas bostandyǵyn shekteý týraly úkim shyǵardy. Sondai-aq, sot olardy arnaýly ataǵynan aiyrdy.
«Baiandalǵandy negizge ala otyryp, sot sottalýshylardy kináli dep tanydy jáne birinshi sottalýshyǵa 3 jyl 6 ai bas bostandyǵyn shekteý túrindegi jaza taǵaiyndady. Bul rette ol ómir boiy memlekettik qyzmette jumys isteý quqyǵynan, sondai-aq politsiia leitenanty arnaýly ataǵynan aiyryldy. Ekinshi sottalýshyǵa politsiia aǵa leitenanty arnaýly ataǵynan aiyra otyryp, 3 jyl 6 ai bas bostandyǵyn shekteý jazasy taǵaiyndaldy. Úkim zańdy kúshine endi», - dedi Jezqazǵan qalalyq sotynyń baspasóz qyzmeti.
