Búgin Jezqazǵan jylý elektr ortalyǵynda taǵy bir qazandyq isten shyqty. Qazirgi ýaqytta oblys ortalyǵynyń turǵyndaryn jylýmen tek úsh qazandyq qamtamasyz etip otyr, dep habarlaidy QazAqparat.
Jezqazǵan jylý elektr ortalyǵynda sońǵy eki táýlikte 2 qazandyq isten shyqqan. Olardyń birinshisi - № 5 qazandyq 27 qarashada jumysyn toqtatty. Al keshe túnde №6 qazandyqta apat boldy. Qazir qala turǵyndaryn jylýmen tek úsh qazandyq qamtamasyz etip otyr.
Normaǵa sai Jezqazǵandaǵy úilerde aýa temperatýrasy 22 gradýsty quraýy tiis. Apat saldarynan temperatýra 9 gradýsqa tómendep, qazir nebári 13 gradýsty quraidy.
Turǵyndar tarapynan jylýǵa qatysty shaǵymdar osyǵan deiin de birneshe ret túsken. Olar jylytý maýsymy bastalǵannan beri páterleri jylymaǵanyn aityp otyr.
«Qazan aiynan bastap úiimiz bir jylyǵanyn sezbedik. Al sońǵy eki kúnde jaǵdaiymyz odan da beter qiyndady. Aiaz kúsheiip barady, al qubyrlarymyzda jylý joq. Men múgedek bolyp qalǵaly úide otyrýǵa májbúrmin. Endi sýyq úide oranyp-qymtanyp otyrmyn», - deidi Jezqazǵan turǵyny Larisa Grigoreva.
Jezqazǵandyqtar JEO-daǵy apat týraly keshe ǵana, onyń ózi BAQ arqyly bilgen. Birinshi apattan keiin bir kún ótpesten №6 qazandyq isten shyǵyp, JEO basshylyǵy onyń jumysyn da dereý toqtatýǵa májbúr bolǵan.
«Qazir 7,9,11 qazandyqtar jumys istep tur. Árine, bul turǵyndarǵa sapaly jylý berýge jetkiliksiz ekenin túsinemiz. Jylý talapqa sai berilmei tur. Qoldan kelgenniń bári jasalyp jatyr. Jaǵdaidy baqylaýǵa aldyq. Jospar boiynsha, kún batqansha 6-shy qazandyqty iske qosamyz. Artynsha, 5-shi qazandyqtaǵy jóndeý jumystary aiaqtalyp qalar. Qazir jylý tasymaldaǵysh temperatýra 77 gradýs, bul normadan shamamen 9 gradýsqa tómen», - dep túsindirdi Jezqazǵan qalasy ákiminiń orynbasary Erlan Qusaiynov.
Jezqazǵan jylý elektr ortalyǵy «Qazaqmys energiiasy» JShS menshiginde. Jylý kóziniń jabdyqtary 70-shi jyldary ornatylǵan. Kompaniia biyl jańǵyrtý jumystaryna 4 mlrd teńgeden astam qarjy saldy. Aita ketý kerek, isten shyqqan eki qazandyq ta biyl jóndelgen. Alaida olar alǵashqy synaqtarǵa tótep bere almady.
Kómir qoryna keletin bolsaq, bul máselege qatysty da turǵyndardyń kóptegen suraǵy bar. Jergilikti bilik habarlaǵandai, qoimalarda 100 myń tonnadan astam kómir bar, olar tek 24 kúnge jetedi eken.
