Jezqazǵan qalasynyń «Naýryz» saiabaǵynda uly aqyn, aǵartýshy Abai Qunanbaevqa eskertkish ornatyldy. Ashylý saltanatyna memlekettik organdardyń, mádeniet jáne bilim berý uiymdarynyń ókilderi qatysty, dep habarlaidy QazAqparat.
Qatysýshylardy Jezqazǵan qalasynyń ákimi Qairat Ábsattarov quttyqtady.
– Eskertkish 30 jyldyq tarihy bar táýelsiz elge, onyń uly aqyny jáne oishyly Abaidyń talanty men danalyǵyna arnalǵan, – dedi qala basshysy.
Monýmentti oryndaýda sýretshi Said Áinekov pen músinshi Toqtar Ermekov eńbek etti. «Abai taǵylymy» keshenine aqynnyń qola músininen basqa, qara sózderi bar bes tas plitalar kiredi.
Saltanatty shara barysynda Abaidyń ómiri men shyǵarmashylyǵyna arnalǵan teatrlandyrylǵan kórinister qoiylyp, óleńder oqyldy.
Sońynda qala turǵyndary men qonaqtary biylǵy jyly jańartylǵan «Naýryz» saiabaǵyn aralap kórdi.
Abattandyrý aiasynda kireberis jańartylyp, trotýardyń bir bóligi aýystyryldy, júgirý joly paida boldy.
Qoldanystaǵy nysandardy jańartýmen qatar «Naýryz kóje», «Dombyra» jáne «Taiqazan» shaǵyn sáýlet nysandary ornatyldy.
Qarańǵyda qala turǵyndary tórt mýzykalyq shamdy tamashalai alady.
Sondai-aq, saiabaqta 150 terek, qaraǵai jáne qaraǵash kóshetteri otyrǵyzyldy.
Aldaǵy ýaqytta qala biligi «Rýhaniiat» alleiasyn salýdy josparlap otyr.
Munda Ulytaý-Jezqazǵan aimaǵynyń qalyptasýy men damýyna erekshe úles qosqan mádeniet jáne óner qairatkerleriniń esimderimen eskertkish belgiler ornatylady.
