Oblys óńirindegi balalar úilerinde tárbielenip jatqan jetkinshekterge at izin salatyndar, olarǵa mereke saiyn syilyqtar nemese basqasha kómegin beretinder barshylyq. Úkimettik emes uiymdar da balalar úilerimen belsene jumys isteidi. Sonda «tiri jetimderdiń basyna túsken taǵdyr tálkegin qalai jeńildetýge bolady?» degen saýal barlyq jumystyń nysanasyna ainalady. Jaqynda Rýdnyi qalasyndaǵy balalar úiinde qamqorshylar kúnin uiymdastyrǵan «Nur Otan» partiiasy oblystyq filialynyń «Jas Otan» jastar qanaty da osyndai maqsatty alǵa saldy.
Balalar úiinde jumys úsh baǵytta júrgizildi. Psihologtar toby qamqorshylar men jetimdi jebegisi keletinder úshin, balalar úiinen qamqorlyǵyna bala alǵysy kelgen azamattar úshin seminar-trening ótkizdi. Ekinshi top balalar úiiniń tárbielenýshilerimen áskeri-patriottyq tárbie jóninde áńgime ótkizse, úshinshi top jumysyn osyndaǵy jasóspirimderdi volonterlyq jáne qoǵamdyq jumystarǵa baýlý máselesine arnady.
Balalar úiindegi jasóspirimderge Aýǵan soǵysynyń ardageri Muratbek Jubanyshevpen kezdesý qyzyqty boldy. Ol balalarǵa Aýǵan jerindegi qiyn kúnderden áńgimeler aityp berdi. Olar shet jerde ot pen oqtyń arasynda júrip, beibit aýǵan halqyna kómektesti, mektepter men aýrýhanalar saldy. Balalardyń túrli suraqtaryna jaýap bergen Muratbek olarǵa elimizdiń árbir azamaty Otanǵa qyzmet etýi, óz eliniń patrioty bolýy kerektigin aitty. Otan úshin qandai qyzmetke de árqashan daiyn bolýy kerektigin túsindirdi.
– Ásker qyzmeti jeńil emes jáne úlken jaýapkershilikti qajet etedi. Otanǵa qyzmet etý – paryz. Áskeri qyzmetti júrekpen qalap, sanaly túrde barǵanda, adal qyzmet etkende ǵana elińniń, Otanyńnyń naǵyz patrioty bolasyń. Meniń súrleýimmen júrgisi keletin jastarǵa bul iste shydamdylyq, tabandylyq, qaisarlyq bolǵanda ǵana elińniń qorǵany bola alatynyńdy aitqym keledi, – dedi Muratbek Jubanyshev.
Oblystaǵy «Jas Otan» jastar qanatynyń tóraǵasy Erlan Tóletaevtyń balalar úiindegi jasóspirimdermen júrgizgen áńgimesi syrlasý keshine ulasty. Ol tárbielenýshilerge balalyqtyń ótetinin, endi úlken murattar úshin alǵa umtylý qajettigin túsindirdi. Ómirde óz jolyn tabamyn degen jastarǵa múmkindiktiń kóp ekenin, onyń joldaryn aitty. Eń aldymen, ár jasóspirimniń aldynda mamandyq tańdaý maqsaty tur.
– Balalar úiindegi jasóspirimdermen baýyryńa tarta aralasqanda ǵana olar sheshiledi, júrektegi muzy erigendei áser alasyń. Men áńgimelesken balalardyń kóbi bolashaq mamandyǵyn tańdapty. Alda olar oqýǵa tússe eńbek naryǵynda básekege qabiletti maman bolyp shyǵady. Olardy tek balalar úiinde ǵana emes, odan ketken soń da baqylap, jaqsy ortaǵa túsýin qadaǵalaý kerek. Sonda túzý jolyn taýyp ketken jetim balalardyń taǵdyry da jeńildeidi, – deidi Erlan Tóletaev.
«Jas Otan» jastar qanaty belsendileriniń aitýynsha, jetim balalardy qamqorlyqqa alǵan otbasylarmen, balalardyń óz ata-anasymen rýhani-adamgershilik turǵysynda kóp jumys isteýi kerek. Jetim balalarǵa adamdar tarapynan, ainalasynan barynsha shýaq mol túskende ǵana, jazyqsyz jáýdirkózderdiń basyna túsken hal jeńildeidi. Eń bastysy, olardy jaman joldan saqtaimyz.
Názira JÁRIMBETOVA
«Egemen Qazaqstan»
Qostanai oblysy,
Rýdnyi qalasy
.jpeg)