Almaty oblystyq ákimdiginde Elbasy Nursultan Nazarbaevtyń 31 qańtardaǵy «Qazaqstannyń úshinshi jańǵyrýy: jahandyq básekege qabilettilik» atty Joldaýyna orai aktiv jiyny ótti. Jiynda oblys ákimi Amandyq Batalov kún tártibindegi bir másele: Prezident Joldaýynda belgilengen tapsyrmalardy iske asyrýdaǵy oblystyń atqarýshy organdarynyń jumysy týraly baiandama jasady.
Oblys ákimi baiandamasynda Memleket basshysynyń elimizdiń aldyna qoiyp otyrǵan Úshinshi jańǵyrý jónindegi mindetterine keńinen toqtaldy.
- Álemdik daǵdarys jaǵdaiynda qabyldanǵan naqty sharalar óziniń tiimdiligin kórsetýde. «Nurly jol», «100 naqty qadam» Ult jospary iske asyrylýda. Jaqynda ǵana Elbasy ókilettilikti qaita bólý jóninde sheshim qabyldap, konstitýttsiialyq reformalar baǵdarlamasyn usyndy. Elbasynyń «Qazaqstannyń úshinshi jańǵyrýy: jahandyq básekege qabilettilik» Qazaqstan halqyna arnaǵan Joldaýy sol jumystardyń naqty jalǵasy. Biylǵy Joldaý aiasynda Elbasy bes basymdylyqty kórsetip, naqty mindetter qoidy, - dei kele A. Batalov bes basymdyqqa jeke-jeke toqtalyp, olardy oblysta júzege asyrýdyń múmkindikteri jaily baiandady. Ekonomikamyz álemdik damý úrdisinen qalmai, turaqty órkendeýi úshin tsifrly tehnologiiany barlyq salalarǵa keńinen engizýge nazar aýdarylatynyn aitty. Sonymen qatar biznesti damytýǵa barynsha jaǵdai jasap, Almaty oblysynda jolǵa qoiylǵan memlekettik-jekemenshik áriptestik tetigin qoldaný aiasyn odan ári keńeitý qajettigine airyqsha toqtaldy. Jetisý óńiri agrarlyq baǵyttan agrarlyq-indýstrialdyq baǵytqa bet túzep keledi. Bul oraida óńdeý ónerkásibin damytý isi jalǵastyrylyp, ásirese, aýyl sharýashylyǵyna jańa tehnologiiany engizý asa mańyzdy mindet bolmaq. Sondai-aq oblys ákimi óz sózinde eksportqa baǵyttalǵan kásiporyndardy órkendetý, aýyl sharýashylyǵynda kooperativter qurý, jerdi tiimdi paidalaný, jańa jumys oryndaryn ashý, marginal jastardy oqytýǵa, olardy jumyspen qamtýǵa airyqsha kóńil bólý máselelerin de qamtydy.
Jaryssózge shyqqan I. Jansúgirov atyndaǵy JMÝ rektory Qýat Baimyrzaev óz sózinde bilim júiesine jańa tehnologiiany engizý máselesine qatysty oiyn ortaǵa saldy. Elbasy Joldaýynda aitylǵan IT-tehnologiiany meńgerý, qarjylyq saýattylyqty arttyrý, urpaqty otanshyldyq rýhta tárbieleý bilim salasyna da tikelei qatysty ekenin atap ótti.
Oblystyq «Ogni Alataý» gazetiniń bas redaktory Atsalim Idigov Elbasynyń «Qazaqstan - 2050», «100 naqty qadam» siiaqty strategiialyq mańyzy zor qujattarymen Joldaýdyń úndes ekenine toqtaldy. «Kezeń-kezeńimen der kezinde qabyldanǵan josparlar men mindetter elimiz úshin naqty baǵyt-baǵdar bolyp otyr. Joldaýdyń maqsat-mindetterin, oblysta oryndalý barysyn halyqqa jetkizý, nasihattaý baspasózdiń tikelei mindeti. Biz osy mindetti abyroimen oryndaýǵa tiispiz», - dedi A. Idigov.
Sondai-aq jaryssózde oblystyq ardagerler keńesiniń tóraǵasy Ermek Kelemseiit, densaýlyq saqtaý salasynyń ókili Anjelika Kim, «Núsip i K» seriktestiginiń direktory Qanatqan Núsipov Joldaýǵa qatysty oi bólisti.
Jiyn sońynda oblys ákimi A. Batalov oblysta Joldaýdy óńir turǵyndaryna keńinen túsindiretin aqparattyq nasihat toptaryn qurýdy, media-jospar daiyndap, BAQ arqyly da nasihat jumystaryn jandandyrýdy tapsyrdy.
