Esik qorǵanynan tabylǵan Altyn adamnyń kóshirmesi, Jambyl Jabaevtyń dombyrasy men turmysta qoldanǵan buiymdary, Balpyq bidiń urysta kigen dýlyǵasy Astana tórindegi Qazaqstan Qarýly kúshteriniń əskeri-tarihi mýzeiinde kelýshiler nazaryna usynylýda. Almaty oblysynyń Mədeniet kúnderi aiasynda óńir murajailarynan munda barlyǵy 231 eksponat pen Kórkemsýret galereiasynan 30-ǵa jýyq kartina əkelingen, - dep habarlaidy Almaty oblysy əkiminiń baspasóz qyzmeti.
M. Tynyshpaev atyndaǵy oblystyq tarihi-ólketaný mýzeii direktorynyń orynbasary Kúləsh Isabekovanyń aitýynsha, kórmege Taldyqorǵandaǵy ólketaný mýzeiiniń, Kerbulaq aýdanyndaǵy Shoqan Ýəlihanovtyń memorialdyq mýzeiiniń, Eńbekshiqazaq aýdanyndaǵy «Esik» memlekettik tarihi mədeni qoryq mýzeiiniń eksponattary qoiylǵan. Al Taldyqorǵandaǵy Kórkemsýret galereiasy men Jarkent qalasyndaǵy Əbilhan Qasteevtiń kórkemsýret galereiasynan əkelingen akvarelmen, maily boiaýmen qaǵazǵa, kenepke, aǵashqa salynǵan sýretter astanalyqtar men qala qonaqtarynyń qyzyǵýshylyǵyn týǵyzýda.
Kelýshilerge ekskýrsovodtar qazaq, orys, aǵylshyn tilderinde jədigerler men olardyń tarihy týraly keńinen əńgimeleidi. Məselen, Balpyq bidiń XVIII ǵasyrda qalmaqtarmen soǵys kezinde kigen dýlyǵasyn urpaqtan urpaqqa kózdiń qarashyǵyndai saqtap kelgen Jolaman aýylynda turatyn tikelei urpaǵy 1980 jyldary murajaiǵa əkelip tapsyrǵan. Al jyr alyby Jambyldyń mýline jibimen toqyǵan portretin 1930 jyldary Ózbekstannyń on alty jasar sýretshisi aqynǵa syiǵa tartqan.
Aita ketsek, «Astana EKSPO-2017» halyqaralyq kórmesine orai ótip jatqan Almaty oblysynyń Mədeniet kúnderiniń aiasynda uiymdastyrylǵan tarihy syrǵa tunǵan jədigerler men kórnekti kartinalar kórmesi aldaǵy tamyz aiynyń 7-sine deiin jalǵasatyn bolady.
