Halyqaralyq mamandandyrylǵan EKSPO-2017 kórmesi ótip jatqan Astana qalasynda óńirlik taýar óndirýshilerdiń kezekti jármeńkesi ótti. Bul joly Elorda turǵyndary men qonaqtaryna Almaty men Aqtóbe oblystarynyń sharýalary baý-baq pen baqshalyq ónimderin jetkizdi. Jetisý aimaǵynyń úsh qalasy men on alty aýdan ortalyǵynan kelgen sharýalar 1 mlrd. teńgeniń 2800 tonna ónimin usyndy. Jármeńkede 250 aýylsharýashylyǵy taýarlaryn óndirýshiler kókónister men jemis-jidek, baqsha daqyldaryn saýdalady.
Kartop baǵasy qyzyqtyrdy
Almaty oblysynyń ónimderine tutynýshylar tarapynan suranys joǵary boldy. Astanalyqtar, kelisi 180-nen 210 teńge aralyǵynda puldanǵan biylǵy kartoptardy kóptep satyp aldy. Sondai-aq, qulpynai, shie, balyq jáne sút ónimderi de jaqsy ótken. Oblys ákimdigi ókilderiniń aitýynsha, saýda kórigin qyzdyrýshylardyń arasynda jappai satyp alýshylar da bar.
– EKSPO – 2017 kórmesi kezinde biz Astanaǵa 19 myń tonna ónim jetkizýdi josparlap otyrmyz. Bizge kún saiyn 7 myń tonna ónim jetkizetin distribiýtorlyq kompaniialar bar. Al jyljymaly jármeńkelerde sharýalar 12 myń tonna ónim ákeledi. Mundai sharalar oblys kásipkerleri úshin asa tiimdi. Ystyq aýa raiyna qaramastan óndirýshiler Elorda jármeńkesinen qalmaýǵa tyrysyp baǵýda.
Bizde refrijerator fýralar bar, barlyq ónimder sonda saqtalady. Maýsym barysynda biz jármeńkege úsh ret qatysyp, kókónister men jemis-jidekter, baqsha daqyldaryn saýdalaimyz degen niettemiz, – deidi oblys ákiminiń orynbasary Serikjan Beskempirov.
Sóredegi taýarlar tekseristen ótken
Osyndai saýda jiyndarynda Astananyń aýylsharýashylyq basqarmasy ókilderiniń qoiylǵan ónimderdiń baǵasyna monitoring júrgizip, sanitarlyq talapty qadaǵalaityndyǵyn aita ketken jón. Baǵa saiasatyn baqylaǵannan tys munda ertemen veterinar dárigerler kelip, jumys isteidi eken. Olar arnaiy zerthanalarda synama júrgizip, qaýipti zattardyń bar-joǵyn anyqtaidy. Sonymen qatar jármeńkede tutynýshylardyń quqyǵyn qorǵaý departamentiniń, qalalyq ákimdiktiń ókilderi de kezekshilik atqaryp, saýdager-diqandardyń, sharýalardyń qujattaryn tekseredi. «Saýda sórelerine taýarlar tolyq tekseristen ótkennen keiin ǵana qoiylady», – deidi Astana qalasynyń aýyl- sharýashylyq basqarmasy azyq-túlik ónimderi qaýipsizdigin qamtamasyz etý bóliminiń basshysy Rizagúl Músilimova.
Diqandar járdemine dán riza
Almaty oblysynyń jármeńkesi qasietti Ramazan aiyna tuspa-tus kelgendikten, óńir taýar óndirýshileri Elordanyń muqtaj otbasylaryna, jetim balalarǵa, áleýmettik jaǵynan az qamtylǵan top ókilderine qoldarynan kelgen kómekterin kórsetti. «Meiirimdilik M» qoǵamdyq qory bastap, sharýalar qoldaǵan qaiyrymdylyq sharasynda járdem alýshylar aýylsharýashylyq jármeńkesine shaqyrylyp, olarǵa jemis-jidekter, kókónister jáne kýlinarlyq ónimder úlestirildi.
– «Biz qoldan kelgenshe qarjylai, materialdyq turǵyda kómektesip qana qoimai, muqtaj analar men jetim balalarǵa áleýmettik qoldaý tanytamyz. Múmkindigi shekteýli bala tárbielep otyrǵan ata-analardy jumysqa ornalastyramyz. Astanadaǵy bastamamyzǵa Almaty oblysynyń ákimdigi oń niet tanytyp, qol ushyn sozdy. Jemis-jidek, kókónistermen qamtamasyz etti. Bizdiń balalarymyz jańa pisken ónimder men táttilerden dám tatatyn boldy. Bizdiń daǵdarys ortalyǵynda toǵyz bala tárbielenýde, – deidi «Meiirimdilik M» qorynyń tóraiymy Aigúl Seiilova.
Atalǵan qor ókilderi Jetisý óńirinen kelgen taýar óndirýshilerge shyn júrekten alǵystaryn bildirýde. «Ramazan aiynda jasalǵan bul izgilikti istiń saýaby molynan bolǵai. Jetim balalar, jalǵyz basty qarttar, muqtaj otbasylar aýylsharýashylyǵy ónimderimen járdemdesken diqandarǵa dán riza», – deidi olar.
Ashat RAIQUL
