Jetisý oblysy ákiminiń brifingi: Isabaevty Marjan basqardy

Foto:OKQ 

Ákimge ár jýrnalist eki suraqtan qoiýyna ruqsat etilgen. Kezegi kelip, ULT.KZ tilshisi de óz suraǵyn qoiǵan edi, buǵan deiin «anyqtaý maqsatynda» dep tipti 4-5 suraq qoiǵan jýrnalisterge  úndemegen OKQ moderatory bizge kelgende erejeni eske túsirip, «taqyryptan aýytqydyńyz» dep shúilikti. 

ULT.KZ: «Ulttyq statistika biýrosynyń málimeti boiynsha kirisi kúnkóris deńgeiinen tómen azamattar sany boiynsha Jetisý Túrkistannan keiin, ekinshi orynda. Halyqtyń 7,8% kirisi kúnkóris deńgeiinen tómen dep sanalady. Jaqynda dollar qatty qymbattap, taýarǵa da baǵa qosylǵany baiqaldy. Jetisý turǵyndarynyń turmysy budan ári túsip ketpei me? Jáne sizdiń jalaqyńyz halyqtyń ortasha tabys kózinen 7 ese kóp ekenin byltyr estigenbiz. Ótken jyly brifingte 1,9 mln tg jalaqy alatynyńyzdy aittyńyz. Sizdiń ailyǵyńyz ben halyqtyń tabysy arasyndaǵy mundai alshaqtyq halyqtyń turmysyn jete túsinýge kedergi keltirmei me?» -dedik.

OKQ moderatory: «Suraǵyńyzdyń ekinshi bóligi taqyryptan tys», -dep, ákimge qaiyrylyp: «Oǵan jaýap bermeseńiz. Birinshisine jaýap bere berińiz», -dedi.

ULT.KZ: «Joq, ekeýi bir birine bailanysty ǵoi?!» -degenimizge qaramastan, tizgin óz qolynda bolǵasyn «Ereje barlyǵyna birdei» degen jeleýmen Ortalyq kommýnikatsiialar qyzmeti moderatory suraǵymyzǵa tolyqqandy jaýap alýǵa kedergi keltirdi.

Al biz Beibit Isabaevtyń jaýabyn kúttik. Sebebi, suraq tolyq qoiyldy, moderator ony qandai suraq dep tapqany emes, ákimniń jaýaby mańyzdy. Alaida, bildei bir oblysty basqaryp otyrǵan Beibit Isabaev OKQ moderatory Marjannyń basqarýynan shyǵa almady. Moderator ákimniń qai suraqqa jaýap berýin, qai suraqqa jaýap bermeýin nusqap otyrdy.

Foto:OKQ 

Beibit Isabaev: «Eldiń áleýmettik-turmystyq deńgeii kóp faktorlardan quralady. Turaqty jumys orny, jalaqysynyń joǵary mólsheri... Ekinshiden, óziniń jeke biznesi. Al bizdiń óńir úlken zaýyttar, fabrikalar, úlken óndiris oshaqtary salynǵan aimaq emes. 60 paiyzdan astamy aýyldy jerde turady. Negizgi tirlik jasap jatqan kózi - mal, egin ónimderi, júgeri, qyzylsha. Sondyqtan qosalqy sharýashylyqtaryndaǵy taýyǵy, qusy, úiregi, taǵy basqalary esepke alynbaidy. Bizde ortasha ailyq jalaqy 288 myń teńge, al mediandyq jalaqy 230 myń teńge. Shyn aitasyz, Túrkistan oblysy bizdiń artymyzda, odan keiin biz. Qolymyzdan kelgenniń bárin jasap jatyrmyz. Ne isteý kerek? Jańa jumys oryndaryn ashý kerek. Bir. Ekinshiden, “Aýyl – el amanaty”, “Aýyl – el besigi”, jastarǵa beretin arnaiy baǵdarlamalar bar, solarǵa qatystyrý kerek te, árkim óziniń jeke tirligin jasaýy qajet. Múgedektigi bar adamdarǵa deiin jeke tirligin jasaýy tiis. Soǵan biz kómektesýimiz kerek. Úshinshi, shamamyz kelgenshe granttar bólýimiz kerek. 400-500 mln-nan bastap, 1 mld-tan asyp ketti granttar beremiz. Sodan keiin, adrestik áleýmettik kómekti bilesiz ǵoi? Sony alady. Jinaqtalyp kelgende árine oblysymyzdaǵy kórsetkishtiń tómen ekeni ras. Qolymyzdan kelgenniń bári jasap jatyrmyz. Jańaǵy úilerdiń ózin osy adamdarǵa biz birinshi kezekte berip jatyrmyz. Balalaryn mektepke, balabaqshaǵa aparý, balalarynyń tamaǵy tegin. Oblystyń biýdjetinen bir mezgil qysqy kiimderin alyp berý, ol da bizdiń moinymyzda. Qolymyzdan kelgenshe jumysty júrgizip jatyrmyz», -dedi ákim.

Ákim ózi aitqandai Jetisý oblysynda halyqtyń ortasha ailyq jalaqy – 288 myń teńge, al mediandyq jalaqy – 230 myń teńge. Byltyr brifingte oblys basshysy 1,8–1,9 mln teńge jalaqy alatynyn aitqan. Eseptesek, Beibit Isabaevtyń ailyǵy halyqtyń tabysynan 7 ese kóp bolyp shyǵady eken. Sondyqtan da biz ákimge suraǵymyzdy moderatordyń kedergi keltirgenine qaramastan qaita qoidyq.

ULT.KZ: «Sizdiń jalaqyńyzdyń halyq tabysynan munsha alshaq bolýy eldiń jaǵdaiyn túsinýge áser etpei me?» -dep suraǵymyzdy qaita qoidyq. Sebebi, jaýap tolyq alynbady. Osy kezde moderator Marjan bizge taǵy da eskertý jasady. 

Buǵan deiingi brifingterde spiker moderatordy toqtatyp, suraqqa jaýap berip ótýdi qalaitynyn aitqan kezder bolǵan. Biraq Beibit Isabaev taǵy da moderatordyń aitqanynan shyqpady. Sosyn, biz kelesi suraǵymyzdy qoidyq. 

ULT.KZ: «Jol infraqurylymynyń ishinde kópirler ásirese aýyl turǵyndary úshin asa mańyzdy. Oblysta kópirler jóndele me?» -dedik. 

Beibit Isabaev: «15 kópirdi jóndeimiz dep úsh jylǵa mindetteme aldyq. 5 kópir biyl jóndeldi, 5 kópir kelesi 2025 jyly jóndeledi, taǵy 5 kópirdi 2026 jyly jóndeimiz. Sonymen oblystaǵy kópir máselesi támam bolady», -dedi Jetisý oblysynyń ákimi.  

Ulttyq statistika biýrosynyń málimeti boiynsha 2024 jylǵy 1 qarashaǵa oblys halqynyń sany 695,6 myń adamdy qurady, sonyń ishinde qalalyqtar 311,6 myń adam (44,8%) , aýyldyqtar 384,0 myń adam (55,2%).