29 sáýir kúni Túrkistan oblysy Jetisai aýdanyndaǵy birneshe aýyldyń sharýalary ekken qyryqqabattary shiri bastaǵanyn aityp shaǵymdandy. Bul týraly Azattyq tilshisi habarlady.
Shablan Dildabekov aýyldyq okrýginiń turǵyny Anarbai Áshimtaevtyń aitýynsha, 3 gektar jerge 75 myń túp qyryqqabat ekken. Sózinshe, qyryqqabat ósirip, daiyndaýǵa alty million teńge jumsaǵan. Ol aýylda satyp alatyn adam bolmaǵan soń 600 myń teńgege júk kóligin jaldap, Qaraǵandy qalasyna alyp barmaqshy.
- Shyǵyn shash-etekten. Kapýsta pisti. Ótkize almai dal bolyp otyrmyz. Qaraǵandyǵa alyp baraiyq dep táýekelge bardyq. Kórip tursyzdar pisken kapýstalar shiri bastady. Endi taǵy bir aptada satyp úlgermesek, jarylyp, aǵyp ketedi, - deidi ol.
Egin alqaptarynan shirigen qyryqqabattardyń iisi shyǵa bastaǵan. Jarylyp jatqan qyryqqabttar da bar. Keibir sharýa jarylǵan qyryqqabatty tegin alatyn adam tappai dalaǵa tógip jatyr.
- "Karantin, úiden shyqpa" deidi. Shyqpaǵanda ne isteimiz? Eginimiz aǵyp, sasyp jatyr. El basynda otyrǵandar myna shirip jatqan kapýstany kórsinshi. Kelisin 10 teńgeden surap jatyr. Paida kórýdi aitpaǵanda, bir keli kapýstanyń shyǵyny 50 teńgege barady. Úkimet osynsha sharýany shyryldatyp qaida qarap otyr? Eń bolmaǵanda sýbsidiia bólmei me? - deidi Abai aýyldyq okrýginiń turǵyny Nazira Ótegenova.
Abai aýyldyq okrýginiń ákimdiginiń málimetinshe, munda 230 gektar jerge qyryqqabat egilgen. Koronavirýs pandemiiasyna engizilgen karantinge bailanysty ónim daiyn bolǵanymen qyryqqabat satyp alatyn adamdar az.
28 sáýir kúni Túrkistan oblysynyń ákimi Ómirzaq Shókeev úkimetten qyryqqabat ekken sharýalarǵa kómek berýdi suraǵan. Ákim oblysta 250 myń tonna qyryqqabat daiyn turǵanyn, sharýalar ótkize almai jatqanyn málimdegen. Premer-ministr Asqar Mamin bul máseleni sheshýge kómek berýdi Aýyl sharýashylyǵy ministrligine tapsyrǵan.
Qazaqstanda koronavirýs tarap, eldiń basym bóliginde karantin jariialanǵan. Osydan soń ár aimaqtaǵy dihandar men sharýalar ónimderin basqa oblystarǵa shyǵara almai qaldy.
