«Jetibai-Jańaózen» jol ýchaskesiniń bir shaqyrymyn salýǵa 1,2 mln AQSh dollary somasynda qarjy jumsalmaq. Bul týraly búgin Senatta QR IDM Avtomobil joldary komiteti tóraǵasynyń orynbasary Satjan Ablaliev málim etti, dep habarlaidy QazAqparat.
«Salynatyn joldyń qunyna toqtalatyn bolsaq, ol joldyń sanatyna qurylys júretin óńirge nemese jerdiń bederine bailanysty bolady. Búgingi kúni bizdiń shyǵaryp otyrǵan jobamyzda 1 shaqyrymy (birinshi sanattaǵy tórt jolaqty jol) 1,2 mln dollar shamasynda, iaǵni 400 mln teńge kóleminde. Basqa óńirlerde eldi mekenderge jaqyn jerlerde jáne jasandy qurylystar kóp jerlerde jol qurylysynyń quny 600 mln teńgege deiin jetedi», - dedi S. Ablaliev.
Óz kezeginde QR Investitsiialar jáne damý vitse-ministri Timýr Toqtabaev «Jetibai-Jańaózen» ýchaskesin qarjylyndyrýdyń mán-jaiyn túsindirip berdi.
«Zaim týraly negizgi kelisimge 371 mln dollar somasynda 2013 jyly qol qoiyldy jáne zańmen sol jyly ratifikatsiialandy. 170 shaqyrymdyq «Shetpe-Aqtaý» jolynyń ýchaskesin qaita salý jumysy aǵymdaǵy jyldyń sońyna qarai aiaqtalady. Konkýrstyq rásimder men devalvatsiiadan keiin tiisti kólemde qarjy únemdeldi. Úkimet tarapynan 73,3 mln dollar kólemindegi osy qarjyny kórshiles «Jetibai-Jańaózen» ýchaskesin qaita salýǵa paidalaný týraly sheshim qabyldandy. Osy oraida 2017 jyldyń maýsymynda Qazaqstan men Aziia damý banki arasynda kelisimge qol qoiyldy»,- dedi T. Toqtabaev.
Atalǵan qarjy 73 shaqyrym aralyqtaǵy tórt jáne eki jolaqty qozǵalysy bar asfalt-betondy joldyń qurylysyna baǵyttalady. Sonymen qatar bir jol airyǵy, eki kópir, 19 sý ótkizý qubyry salynady. Joba 2017-2019 jyldary júzege asyrylady.
