Aýyl sharýashylyǵy ministrligi sharýalardyń júrip-turý algoritmin ázirledi. Bul týraly Ortalyq kommýnikatsiialar qyzmetinde ótken onlain baspasóz konferentsiiasynda aityldy, dep habarlaidy QazAqparat.
«Memleket basshysy kóktemgi dala jumystaryn ońtaily merzimde júrgizý úshin jaǵdai jasaýdy tapsyrdy. Bul tapsyrmanyń oryndalýy ministrlik, ákimdik deńgeiinde júzege asyrylýda. Karantinge qaramastan, aýyl sharýashylyǵy taýar óndirýshileri kóktemgi dala jumystarynyń merzimin saqtaýda. Egis naýqany búginde jeti óńirde júrgizilýde. Elimizdiń ońtústik óńirlerinde jazǵy egis alqaby - 16%-dan 80%-ǵa deiin. Jambyl oblysynda - 326 000 ga, Almaty oblysynda - 239 000 ga, Túrkistan oblysynda - 230 000 ga, Qyzylorda oblysynda - 28 000 ga egis alqaby bar, al ózge óńirlerde egis jumystary bastalý satysynda tur», - deidi QR Aýyl sharýashylyǵynyń birinshi vitse-ministri Aidarbek Saparov.
Onyń aitýynsha, Batys Qazaqstan, Pavlodar jáne Atyraý oblystary egin egýdi bastady.
«24 sáýirdegi jaǵdai boiynsha respýblikanyń qalǵan óńirlerinde egis aldyndaǵy jumystar júrgizilýde. Óńirler arzandatylǵan janar-jaǵarmaimen, tuqymmen jáne tyńaitqyshpen qamtamasyz etilgen. Tehnika daiyn. Egis jumystary buryn sońdy bolmaǵan karantin jaǵdaiynda ótkizilip jatyr. Azamattardyń júrip-turýyn shekteýge bailanysty blokposttan ótý qiyndyǵyna qatysty fermerlerden kóptegen shaǵym kelip tústi. Aýyl sharýashylyǵy ministrligi sharýalardyń júrip-turý algoritmin ázirledi. Ol memlekettik komissiianyń 17 sáýirdegi otyrysynda maquldandy. Bul algoritm ákimderge jetkizildi», - deidi ol.
